‘Clean-Up Drive’ Kasado Karong Martes

Ipahigayon sa kagamhanan sa dakbayan sa Sugbo, pinaagi sa Project REDZ, kon ‘Reduce Danger Zones’ ang Clean-up drive sa coastal areas sa barangay Mambaling ug Duljo Fatima karong umaabot nga Martes, Agosto 6, 2013.

Ang clean-up drive maoy unang lakang sa proyekto nga salmotan sa mga nagkadaiyang kawani sa dakbayan ug mga pribadong sektor.

Ang Project REDZ nga gilangkuban sa mga nagkadaiyang opisina ning syudad, inisyatiba ni Mayor Michael Rama og gitahasan sa Mayor si Atty. Jose Daluz nga maoy mangulo niini.

Tumong sa project REDZ mao ang paglikay sa disgrasya ug pagpanalipod sa mga lumulopyo ning syudad nga anaa nahimutang sa mga ‘Danger zones’ o ‘High-risks areas’ kon dilikadong mga lugar.

Kahinumduman nga niadtong Hulyo 24, 2013, ang mga sakop sa Project REDZ nagpahigayon og ocular inspection sa Sitio Alaska sa Barangay Mambaling diin nakita ang mga basura nga gipataka lamang og labay daplin sa dagat. Aduna usay mga kasilyas nga deretso sa dagat ang mga hugaw, aduna pa gayu’y daghang mga baruto ug pump-boat nga nakalaray sa maong dapit. Apil niini ang mga bata nga naglangoy-langoy sa hugaw nga tubig dagat ug uban pang mga problema nga kinahanglang aksyonan.

Lakip sa gi-inspeksyon sa grupo mao ang Sitio Barrio Plastic sa Barangay Duljo Fatima diin nasuta nga abot sa tuhod nga tubig-dagat, milanat na ngadto sa mga panimalay nga anaa daplin  sa dagat ug nakahatag og risgo sa mga lumulopyo niini.

Sa laing bahin, karong umaabot Setyembre 21, mao kini ang quarterly Coastal ug Urban Clean-up sa liboan ka mga kawani sa kagamhanan sa dakbayan sa Sugbo. (By: Greggy Jiggs P. Senados – PIO Staff)