“Clamping” sa CITOM Gihingusgan

Upat dayon ka sakyanan ang na-clamp sa mga sakop sa City Traffic Operations Management (CITOM) kay ilang nasakpan nga gi-parking lang daplin sa karsada nga makabalda sa pagresponde kun may emerhensya.

Matud ni CITOM operations chief Joy Tumulak nga tulo ka team sa mga traffic enforcers ang ilang gimugna aron mosuroy og gitahasan pag-clamp sa mga sakyanan nga masakpan nga anaa ra sa karsada gi-parking sa mga tag-iya hangtod na sa buntag.

Si Tumulak miingon nga daghan kaayo nga sakyanan ang gipapitlan nila’g warning diha sa windshield unya mogamit sila og megaphone nga nagpahibalo sa tag-iya nga i-clamp ang ilang sakyanan kun dili kuhaon sa dapit nga ilang giparkingan.

Pagbalik sa CITOM enforcers wala na ang mga sakyanan gawas sa upat nga diha ra gihapon og maoy gi-clamp. Ang mga tag-iya makabayad og multa nga P500 walay labot mga pending multahanan kun nadakpan sila kaniadto og gi-rekord lang sa Traffic Violations Bureau (TVB).

Niadtong milabayng Byernes, ang radio operator sa CITOM mitug-an nga dul-an sa 100 ka sakyanan ang ilang gipapitlan og warning nga nagpasidaan sa mga tag-iya nga kalapasan sa balaod ang paggamit sa karsada isip ilang parking area.

Mga bombero nangreklamo tungod kay ang pagresponde nila sa nasunogan mabalda tungod kay kanunay sila nga mababagan sa mga sakyanan nga gi-parking ra daplin sa karsada.