City Hall sa Toledo, Giputla’g Kuryente

Giputlan og kuryente ang Toledo City Hall kagahapon sa udto tungod kay wala kini makabayad sa electric bill sa Cebu Electric Cooperative III nga moabot og P1.3 milyones.

Naapil nga naapektahan sa pagputol sa koryente mao ang Bureau of Fire Protection, Toledo City Police Station, Tourism Office ug ang Travellers Inn nga anaa mag-opisina si Toledo City Mayor Sonny Osmeña.

Ang opisina sa Bureau of Jail Management and Penology (BJMP) ug ang Toledo City Hospital wala apila sa pagputol sa kuryente kay mihangyo ang mga opisyal sa maong mga buhatan.

Ilang gipasabot nga kun putlan nila og kuryente ang prisohan hayan maghimo’g kagubot ang mga piniriso ug ang mga pasyente posible nga adunay mangamatay.

Ang mga konsehal sa maong syudad nasakripisyo atol sa ilang sesyon kagahapon tungod sa pagkapawong sa kuryente.

Ang sesyon gitambongan nila ni Vice Mayor Antonio Yapha Jr., Konsehal Ricardo Pepito, Helen Jill Espinosa, Louis Nicholas Espinosa, Antonio Borja Jr., Rogelio Caburnay, Joie Perales ug Edgardo Aguilar nga mga sakop sa mayoriya.

Mitambong usab ang mga sakop sa minoriya nga sila si Konsehal Leo Dolino, Merly Abad, Zosimo Abellanosa ug ang bag-ong konsehal sa Toledo nga si Dr. James Gaite.

Init ug ngitngit kaayo ang session hall ug nag-iyahay lang og pagbitbit og mga paypay ang mga konsehal apil ang mga tawo nga mitambong sa session.

Apil sa gituki kagahapon mao ang resolusyon ni Konsehal Pepito nga nag-awhag ni Mayor Osmeña ug sa city treasurer nga ipagawas na ang kwarta alang sa pagbayad sa kuryente.

Matud sa mga konsehal nga dili sila makapagawas og re-enacted budget kay aduna na may napasar nga 2014 Annual Budget ang Syudad apan gikwestyon lang sa minoriya.

Hangtod karon pabilin pa nga wala ikapatuman ang P619 milyones nga 2014 budget kay nalutsan og Temporary Restraining Order sa hukmanan sa Toledo.

Ang kampo hinuon ni Mayor Osmeña niduso na og Petition for Certiorari sa Court of Appeals aron paglibkas sa kamandoan sa RTC nga nagpugong paggasto sa kantidad sa budget.

Gawas sa pagputol sa linya sa kuryente apektado usab ang sweldo sa mga kawani sa maong syudad ilabi na ang mga casual ug job orders.