‘City Hall at Your Doorsteps’ Ipahigayon sa Duha ka Barangay

(Cebu City – Public Information Office) — Ipahigayon sa kagamhanan ning dakbayan nga gipangulohan ni Mayor Michael L Rama ang ‘City Hall at Your Doorsteps’ o ‘Piyesta sa Libreng mga Pagpangalagad’ karong Disyembre 12, 2014 adlawng Biyernes ngadto sa Barangay Budlaan ug karong Disyembre 16 adlawng Martes sa Barangay San Jose.

Ang programa inisyatiba ni Mayor Rama nga iyang gisugdan sukad niadtong tuig 2010 sa iyang unang termino isip amahan ning dakbayan diin ang mga batakang serbisyo sa 22 ka mga departamento sa Cebu City Hall dalhon ngadto sa tugkaran sa mga Sugbuanon alang sa paghatag ug libreng mga serbisyo nga alang sa tanan.

Ang maong programa nagahatag ug libreng batakang panerbisyo sa katawhan sama sa kosultasyon sa rehisro sa pagkatawo, pagpakasal, ug pagkamatay; feeding program ug timbang sa mga kabataan; medikal nga konsultasyon; pagpang limpyo sa mga kanal ug drainage; ug pagpanaod ug pagpang-ayo sa mga street lights.

Lakip usab sa itanyag nga mga serbisyo mao ang pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, traffic rules, environmental awareness, mga kalihokan ug kalambuan sa dakbayan, ug uban pa.

Gipahigayon na ang kalihokan matag adlawng Biyernes kini aron nga malukop ug matabangan ang mga lumulopyo sa 80 ka barangay ning dakbayan. Kini usab aron nga ipaduol ang mga serbisyo sa kagamhanan ning dakbayan ngadto sa katawhan aron dili na sila mahasol, mahago ug makaplete pag-adto sa city hall.

Kahinumdoman nga sa milabayng Biyernes Disyembre 5 ipahigayon unta ang ‘City Hall at Your Doorsteps’ ngadto sa Barangay San Jose apan gikanselar kini gumikan sa Bagyong Ruby. Samtang Biyernes sa sunod semana Disyembre 19 walay eskedyol gumikan kay mao kini ang General Christmas Party sa tanang empleyado sa Cebu City Government.

Dugang pa, ang ‘City Hall at Your Doorsteps’ abli usab sa tanan lakip na ang mga residente sa mga kasilinganang barangay kung asa kini ipahigayon. (Greggy Jiggs P. Senados/PIO Cebu City)