CITOM Dili Magpanuko sa Pagdakop

Ang kadagkoan sa Cebu City Traffic Operations Management (CITOM) adunay awhag ngadto sa mga kawani sa City Hall nga giisyohan og mga sakyanan nga dili gayud moabuso kay isip mga traffic enforcers dili sila magpanuko pagdakop kanila.

Ang City Hall adunay kapin sa 1,000 ka sakyanan, apil ang mga motorsiklo, ug giisyu kini ngadto sa mga opisyal ug mga kawani.

Si Joy Tumulak, operations chief sa CITOM, miluwat sa mao nga pahimangno pipila ka adlaw human nga usa ka Multi-Cab sa City Hall gi-clamp sa mga traffic enforcers kay giparking niadtong Sabado sa dalan Pelaez.

Gawas sa paglapas sa balaod trapiko, nakit-an usab sa CITOM ang usa ka botelya sa beer sulod sa sakyanan.

Kagahapon nipahigayon og tigum sila si City Legal Officer Atty. Gerone Castillo ug City Administrator Dra. Lucille Mercado
nga gitambungan nilang Engr. Ruel Tahom kinsa maoy nagpirma sa memorandum receipt sa multicab nga plakang SJM 459; Arnold Lauron nga tag-iya sa bag nga nakit-an sa multicab; Severino Cardiente, driver; ug Perzentino Caruana.

Ang CITOM milusad karon og kampanya nga ang mga sakyanan, ilabi na ang mga public utility vehicles (PUV’s), dili na tugotan nga iparada lang tibuok gabii hangtud na sa kaadlawon daplin sa mga karsada.

Hangtud kaniadtong Sabado, dul-an na sa 40 ka sakyanan ang na-clamp sa mga traffic enforcers kay bisan og giunsa nila sa pag-awhag ang mga tag-iya nga kuhaon ang sakyanan daplin sa karsada wala gayud mohimo.

Daghang sakyanan ang anha ra i-parking daplin sa mga karsada kay ang mga tag-iya niini walay kaugalingong parking area sa ilang mga units.

Ang kabomberohan kanunay nga nagreklamo kay panahon nga adunay sunog nga mahitabo sa sudlonon nga bahin sa barangay maglisud sila pagsulod tungod sa mga sakyanan nga anaa giparking sa karsada.

LTFRB

Ang Land Transportation Franchising and Regulatory Board (LTFRB) adunay lagda nga sa dili pa hatagan og prangkisa ang usa ka PUV kinahanglang ang tag-iya makamatuod nga aduna sila’y grahe sa ilang sakyanan.

Nasayran nga daghang tag-iya og public utiliuty vehicles sama sa taksi, passenger jeepney ug van-for-hires, nakalusot pagkuha og prangkisa kay ang kadagkoan sa LTFRB miisyu lang usab dayon nga wala susiha kun tinuod ba nga adunay grahe ang tag-iya.

Si Tumulak miawhag sa mga kawani sa City Hall nga giisyohan og sakyanan, apil ang mga tag-iya og PUV’s, nga dili gayud i-parking daplin sa karsada ang ilang sakyanan aron wala sila’y problema nga atubangon.

Ang lagda sa Commission on Audit (COA) kabahin sa mga sakyanan sa kagamhanan mao nga human sa oras nga tingtrabaho i-parking g’yud unta sa government parking area.

Hinuon, ang COA Property Custodianship Handbook naglatid nga kun ang ahensya sa kagamhanan walay grahe sa ilang sakyanan mahimo kini nga ipadala na lang sa kawani pagpauli sa ilang balay apan dili gayud gamiton sa personal.