CITOM Adunay Bag-Ong Paagi Batok Traysikad

Ang City Traffic Operations Management (CITOM) sa dakbayan sa Sugbo adunay bag-ong paagi aron mahadlok na ang mga tag-iya og traysikad nga mopadagan sa mga karsada nga wala itugot kanila.

Nahukman sa kadagkoan sa CITOM nga ang mga masakmit nga traysikad tungod sa pag-operate sa mga karsada nga wala itugot kanila dili na dayon i-release bisan og makabayad pa ang mga tag-iya sa multa.

Si Joy Tumulak, operations chief sa CITOM, mipasabot nga gitumong nila kini’ng mao nga paagi aron maleksyon ang mga tag-iya sa traysikad nga dili na sila magpadagan-dagan sa ilang sakyanan diha sa karsada nga gidili ang trisikad.

Matud ni Tumulak nga ilang nahukman nga kada adlaw’ng Biyernes lang sila mo-release sa mga sinakmit nga traysikad bisan pa og sayo mobayad sa multa ang mga tag-iya.

Ang dakbayan sa Sugbo adunay ordinansa nga nagdili sa mga traysikad nga makadagan- dagan sa mga karsada nga agianan sa mga passenger jeepney aron dili sila makabalda sa trapiko.

Apan ang mao nga ordinansa gibaliwala lang sa daghang mga nagmaneho og traysikad. Matud ni Tumulak nga daghan kaayo sila og mga traysikad nga nasakmit.

Ang rekord sa CITOM nagpakita nga gikan lang sa Abril 1 ngadto sa Abril 24 miabot og 182 ka traysikad ang ilang nasakmit, ug hangtod sa miaging semana, 41 lang sa mao nga traysikad ang na-release.

Si Tumulak miingon nga ma-release lang ang masakmit nga traysikad kun makabayad og P1,000 nga multa ang tag-iya o drayber adto sa kahera sa CITOM, apan maghuwat pa sila nga moabot ang Biyernes.

Ang mga drayber sa traysikad mokiat na inigka-hapon pinaagi sa pagsulod diha sa downtown area, ilabi na sa dalan Leon Kilat ug Colon, nga gidili kanila sa pamasin nga makakuha og pasahero para sa Pasil.

Adunay mga drayber og traysikad nga mipasangil nga nadakpan na sila sa mga CITOM Anti-Traysikad Team apan gibuhian human nga mibayad sila og suborno sa mga traffic enforcers.

Kaniadto, gilatid sa ordinansa nga ang masakmit nga traysikad dili na ibalik sa tag-iya ang side car apan adunay mga konsehal nga nagpahumot sa mga tag-iya og traysikad diha’ng nagsingabot ang eleksyon og gipa-amendar ang mao nga lagda.