‘Citizens Hour’ sa Konseho Giduso ni Labella

Gituman gayud ni Vice Mayor Edgardo Labella ang iyang gisaad nga hatagan niya og higayon ang publiko nga makahatag sa ilang baruganan kabahin sa mga isyu atul sa ilang sesyon sa Cebu City Council.

Giduso na ni Labella ang usa ka ordinansahon nga maghimo’g kausaban sa House Rules nga maoy gitamod sa mga konsehal sa pagpahigayon og sesyon diha sa konseho.

Gusto ni Labella nga mahatagan ang publiko sa gitawag og “Citizens Hour” nga sa dili pa gayud magsugod ang pormal sesyon sa mga konsehal, ang publiko makahimo pagpadangat sa ilang baruganan kabahin sa isyu.

Dili hinoon daghan g’yud ang hatagan og higayon nga makasulti apan matud ni Labella, bentaha na lang kini kay sa wala g’yuy higayon nga ihatag sa mga tawo aron makapadangat sa ilang baruganan.

Matud ni Labella nga kining maong lakang paghatag og “Citizens Hour” sa dili pa magsugod ang pormal nga sesyon sa mga konsehal gihimo usab sa mga malamboong dakbayan sa ubang dapit sa kalibutan.

Ang gidugayon sa pakigpulong sa publiko ingon man ang ubang mga detalyi sa pagpahigayon og Citizens Hour hisgutan pa unya sa mga konsehal kon matuki na nila ang gisugyot nga ordinansahon ni Labella.

Kining maong lakang gipaabot nga iduso pa ngadto sa Committee on Laws ang Ordinances aron kahimoan og pagtoon. Hinoon daghang mga konsehal ang mipadayag nga suportahan nila ang tinguha ni Labella.

Kon kini maaprobahan, bisan ang mga sakop sa media nga gusto nga mopadayag sa ilang baruganan kabahin sa isyu mahimong mobarug atubangan sa mga konsehal og mobatbat sa ilang baruganan.