Christmas Bonus sa City Hall, Aprobado Na

Sigurado na’ng makadawat og ‘tag P10 mil nga bonus ang kada usa ka opisyal ug kawani sa Cebu City Hall human nga giaprobahan sa mga konsehal ang Supplemental Budget No. 3 nga giduso ni Mayor Michael Rama.

Ang Cebu City Council miingon nga ang bonus kinahanglan nga ihatag sa dili pa ang pasko. Si Mayor Rama nalipay nga giuyonan sa mga konsehal ang gisugyot niya nga bonus ug miingon nga nagpaabot gani siya nga dugangan ang kantidad sa konseho.

Sa miaging tuig, ang matag opisyal ug kawani gipanghatagan og ‘tag P20 mil apan wala gibutang nga bonus, kondili gibutang kini isip calamity financial assistance tungod sa linog ug sa bagyo’ng Yolanda nga maoy hinungdan nga nag-atubang og kaso sila si Mayor Rama ug kaubanan.

Ang ubang mga kawani sa City Hall ingon sa gigamyan sa ‘tag P10 mil nga bonus tungod kay nagpaabot sila nga ang ipahatag kanila ni Mayor Rama ‘tag P15 mil.

Apil sa makadawat sa ‘tag P10 mil nga bonus mao si Mayor Rama, Bise Mayor Edgardo Labella ug ang tanang mga konsehal. Daghan ang nasurpresa tungod kay paspas kaayo nga gi-aprobahan sa City Council ang giduso nga supplemental budget nga walay lantugi.

Dihang gisukna kun unsay gastohan niya sa iyang madawat nga bonus, si Rama nagkanayon nga daghan kaayo siya og mga alalay nga hatagan og pinaskohan.