CHED 7 Mitataw: Bacaltos Maoy Giila nga Hepe sa TCC

●Bisan og midesisyon na ang CSC sa pagpa-reinstate ni Ramos, wala kini mipakita’g intensyon nga mobalik pagdumala sa TCC.

Giklaro sa Commission on Higher Education (CHED)-7 nga ang giila nga acting president sa Talisay City College (TCC) sa pagkakaron mao si Acting President Richelle Bacaltos.

Kini bisan pa man og si Dr. Paulos Cañete gipili ug giinsister ni Talisay city Mayor Johnny Delos Reyes nga maoy acting president sa TCC ug ingon man sa gipagawas nga kamanduan sa Civil Service Commission (CSC) nga ibalik si former TCC president Tomas Ramos sa puwesto tungod kay illegal ang pagkatangtang niini sa katungdanan.

Sigon pa ni Education Supervisor II Dr. Josefino Ronquillo sa CHED-7 nga sa pagkakaron, si Bacaltos pa ang giila nga lehitimong acting president sa maong tulunghaan kay mao man kini ang nakakuha og tukmang papeles nga maoy modumala sa maong kolehiyo.

Gitug-an ni Ronquillo nga bisan og may desisyon na ang CSC sa pagpa-reinstate ni Ramos, apan si Ramos wala pa mipakita og intensyon nga mobalik sa pagdumala sa maong kolehiyo.

Giluwatan niini ang maong pamahayag aron dili mausik ang kwarta ug kahago sa mga tinun-an nga magpa-enroll sa naasoy nga tulunghaan ug angayan nga adto kini magpa-enroll sa buhatan ni Bacaltos.

Sa iyang bahin, si Cañete miingon nga dili makiangayon ang gihimo sa CHED-7 busa mibahad kini nga mohimo og legal nga lakang batok sa CHED kay mipagawas kini og pamahayag bisan pa kun nagpadayon pa ang pagdungog sa korte sa maong isyu.