CFCVFB Mi-Donar og Kagamitan sa City Fire-Fighting Team

Ang mga sakop sa Cebu City Hall fire-fighting team nakaangkon karon og kagamitan nga makapalambo sa ilang serbisyo kun adunay sunog nga ila nga marespondehan.

Ang Cebu Filipino-Chinese Volunteer Fire Brigade (CFCVFB) mihatag og mga fire-fighting equipment ngadto sa Command Control Center (C3) sa dakbayan sa Sugbo aron magamit kini sa kaugalingon niini nga mga bombero.

Ang gidonar naglakip sa unom ka bag-o nga mga heat-proof nga firemen’s jacket, 10 ka bag-o nga helmets, 10 ka bag-o nga boots, 10 ka trousers ug 19 ka fire-proof nga pantalon.

Matud ni Wilton Uykingtian nga maoy fire marshall sa Filipino-Chinese Fire Brigade ug ang iyang pangabaga nga si Atty. Ronnie Gocuan nga ang ilang kahugpongan motabang nga molambo ang C3 Fire fighting team.

Misaksi sa turn-over ceremony sila si Konsehal Dave Tumulak, Simeon Romarate ug Alvin Santillana, ang pangulo ug puli-pangulo sa Cebu City Disaster Risk-Reduction and Management Office.

Ang mga donasyon gihatag human nga ang 20 ka C3 volunteer firemen nakahuman sa ilang pagbansay-bansay nga gipasiugdahan sa mga sakop sa Fil-Chi Volunteer Fire Brigade.

Matud ni Santillana nga giuli na usab sa Filipino-Chinese Volunteer Fire Brigade ang tulo ka fire trucks nga gipahuwaman kanila sa dakbayan nga naglakip sa usa ka ladder-truck, water tanker ug pumper.

Ang fire marshall sa Fil-Chinese Fire Brigade misaad nga mahimo’ng dugangan pa nila ang ilang donasyon sa umaabot nga mga adlaw aron nga makatabang sila pagpalambo sa City Hall fire fighters.

Sa laing bahin, niadtong adlawng Dominggo kagahapon, usa ka sunog ang miulbo sa Brgy. Camputhaw, syudad sa Sugbo, nga mikalas ug usa ka mulopyo ug nagbakwit ug kapin 50 ka pamilya.