Centralized Registration sa LTO, Problemado

Ang labing daku nga opisyal sa Land Transportation Office (LTO) dinhi sa Central Visayas wala magtoo nga makasinati sila og grabe’ng problema kun sugdan na ang pagpatuman sa centralized registration sa mga bag-o nga sakyanan adto sa ilang rehiyonal nga buhatan.

Si LTO-7 Acting Regional Director Arnel Tancinco miingon nga sugod sa Lunes, karong adlawa, ang pagpangrehestro sa mga bag-o nga sakyanan adto ra g’yud trabahoon sa LTO regional office nga nahimutang sa Natalio Bacalso Avenue.

Matud ni Tancinco nga dili kaayo daghan ang mga bag-o nga sakyanan nga ipangrehestro matag adlaw sa mga vehicle distributors ug nagtoo ang mga opisyal sa LTO nga dili sila makasugat og problema kabahin sa pagbalik sa transaksyon didto sa regional office.

Nagtoo pa gani ang mga opisyal sa LTO nga mopaspas ang pag-process sa mga dokumento kun adto kini himuon sa regional office.

Si Tancinco miingon nga distinohan niya’g daghang kawani ang mohimo og “evaluation” sa bayranan kay sagad anha diha malangan ang mga dokumento.