Palasyo, Miseguro nga Walay Panalipdan sa Imbestigasyon sa Anomaliya sa ERC

Giseguro karon sa Malakanyang nga walay mahitabong “white wash”ug walay panalipdan sa ipahigayong imbestigasyon kalabot sa alegasyon sa nagpakamatay nga si Bids and Awards Committee Chairman Francisco Villa Jr. nga adunay nangahitabong korapsiyon sa Energy Regulatory Commission (ERC).

Una nang migawas sa mga taho nga ang gihimong pagpakamatay ni Villa adunay kalabotan sa giingong nahitabong mga anomaliya sa ahensiya.

Gihimo sa Malakanyang ang pagsiguro atubangan sa direktiba mismo ni Presidente Rodrigo Duterte nga magpahigayon og imbestigasyon sa giingong panghitabong irigularidad sa ERC.

Gimando na usab sa Presidente ang pagluwat sa pangatungdanan sa mga opisyal sa ahensya.

Matud pa ni Presidential Communications Office (PCO) Kalihim Martin Andanar, walay santohon ug maigo gayud ang bisan kinsang maigo sa ipahigayong imbestigasyon.

Apan sa pagkakaron, gipahayag ni Andanar nga wala pa’y namugnang special body aron modumala sa ipahigayong imbestigasyon taliwala sa nabutyag nga anomaliya sa maong ahensiya. (ecb/PIA7-Bohol)