Cebuano News: Bansay Pagsuwat Alang Sa UNSHS Ubay, Malampuson
CASA NIPA, Bood Ubay, Bohol, July 25 (PIA)—Malampuson nga gitapos sa mga tinun-an sa Ubay National Science High School (UNSHS) ang duha ka adlaw nga Basic Journalism Seminar nga gitanyag sa Philippine Information Agency sa Bohol (PIA-Bohol) didto niadtong Hulyo 24-25, 2018.
Labing bag-o nga natanyagan sa bansay sa pagsuwat ang Ubay National Science High School Hulyo 24-25. (PIA/Bohol)
Ang bansay, nga opisyal nga gitawag og School-based Campus Journalism Training Seminar nga may tema nga Igniting the mind of the young Journalist in Rowing the Boat of Journalism, didto himo-a sa Casa Nipa, Bood, Ubay.
Ang bansay, gipaagi na usab sa online-interactive writing, diin ang mga misalmot, moduso sa ilang mga gisuwat ngadto sa usa ka online nga facility og ipaambit sa kadaghanan aron dungan nga makakita ang tanan kon usa pa ang angayan nga ayohon ug tarungon sa mga gisuwat.
Kap-atan og unom ka mga magsusuwat ug sakop sa bahan sa Explorers, ang opisyal nga mantalaan sa tunghaan ang mitapos sa bansay sa Basic News writing, Feature Writing, Photo Journalism, Copy Reading ug Headline Writing, ug Junior Broadcasting, lakip na ang mga writing workshop practicum, presentations ug critiquing didto gipahigayun sa plenary hall sa Casa Nipa.
Ang UNSHS daan na nga suki sa PIA Bohol sa bansaybansay niini, apan naputol ang katali-an dihang sa adlaw mismo sa bansay niadtong 2013, na-igo ang Bohol sa usa ka kusog nga linug.
Matud sa usa ka magtutudlo nga si Ariel Rosales, dugay na sila nga naghandum nga makabalik ang mga bansay sa pagsuwat, apan kanunay sila nga ma-apike sa higayon.
Si Glinda Acedo, ang school publication adviser, kinsa wala mopalta sa pagtambong sa matag sesyon sa bansay miangkon nga daku og gikatabang ang seminar sanglit matud niya, walay mas labing maayo pa nga makatudlo sa mga bata sa tukmang mga paagi, kon dili kadtong mga practitioners.
Gipasabut sa PIA, nga ang ilang tanyag nga mga workshops, nahalakip sa ilang tumong nga kagamhan ang mga kabataan sa mga tukmang pag-ensayo sa pagsuwat, sa pagtimbang sa mga isuwat kon angayan ba kini ug sa pagtan-aw usab kon katuohan ba ang gisuwat.
Kini subay na usab sa pagkatag sa mga gitu-is nga balita og kadtong gituyo gayud nga pagsuwat sa bakak ug dili tinuod nga mga pasangil aron lamang pagdaut sa tawo.
Ang bansay sa PIA giabagan usab sa beterano nga manunuwat: Ric Obedencio ug sa Bohol Balita Daily News. (rahc/PIA-
7/Bohol)
