Cebu Dili pa Mahimong ‘Rabies-Free’

Dili mosaler ang pangagpas nga mahimo na nga ‘rabies-free’ ang lalawigan sa Sugbo sa sunod tuig gumikan kay may namatay na nga tawo nga napaakan sa iro sa milabay nga tuig.

Kini ang gitumbok sa mga kadagkuan sa Integrated Provincial Health Office (IPHO) kinsa nagkanayon nga hanap ang maong pangandoy sa Department of Health (DOH)-7 nga mahimo na nga libre sa rabies ang tibuok lalawigan sa Sugbo ug ang tibuok rehiyon 7 sa tuig 2015.

Si Renan Cimafranca sa Regional Epidemiology and Surveillance Unit (RESU) sa DOH-7 mipasabot nga ang lugar nga madeklarar nga rabies free gikinahanglan nga way matalang tawo nga napaakan og iro nga rabison sulod sa sunod-sunod nga tulo ka tuig.

Matud ni Cimafranca nga sa miaging tuig, ang ilang buhatan naka-record og upat ka tawo sa Central Visayas nga namatay human paaka sa iro nga may rabies. Iyang giasoy nga ang tulo sa namatay taga Negros Oriental ug usa niini taga Cebu.

Matud pa ni Cimafranca nga karong tuiga wala pay tawo o iro nga namatay tungod sa rabies, basi sa talaan sa RESU-7.

Kini human masuta sa ilang buhatan nga dili pinaakan sa iro ang hinungdan sa kamatayon sa usa sa taga Cebu niadtong bulan sa Enero ning tuiga.

Si Cimafranca nagkanayon nga ang Cebu lisod pa nga madeklarar nga rabies-free sa sunod tuig tungod sa kadaghan sa populasyon sa iro nga binuhian.

Midugang siya nga daghan pa usab nga mga tag-iya og iro nga wala kaayo magtagad sa paghikot sa libud-suroy nila nga iro ug gipasagdan lamang kining walay tarong kaon,ug walay bakuna nga magsuroy-suroy sa gawas.