Cebu City Local Job Fair Ipahigayon sa Barangay Hipodromo

Aron sa paghatag ug kahigayonan sa mga katawhang Sugbuanon nga nangita ug trabaho, ipahigayon sa kagamhanan ning dakbayan nga gipangulohan ni Mayor Michael Lopez Rama pinaagi sa Department of Manpower Development and Placement kon DMDP ang usa ka Local Job Fair karong Oktubre 24, 2015 adlawng Sabado ngadto barangay Hipodromo Sports Complex.

Ang kalihokan salmutan sa kapin 30 ka mga lokal nga kompanya ug ahensya nga magtanyag ug gatosan ka mga bakanting trabaho. Magsugod kini sa alas-8 sa buntag ug molungtad hangtod sa alas-3 sa hapon. Gipaluyohan usab kini sa Department of Labor and Employment kon DOLE.

Giawhag ang tanan nga nangita’g trabaho sa pagsalmot sa maong higayon nga maghatag ug oportunidad nga makatrabaho. Giawhag usab ang mga aplikante sa pag-andam sa ilang resume.

Sa susamang kalambuan, ipahigayon usab sa kagamhanan ning dakbayan pinaagi sa DMDP ang usa ka Special Recruitment Activity karong Oktubre 20, 2015 adlawng Martes ngadto sa buhatan sa DMDP nga anaa sa 2nd Floor sa Ramos Public Market Building, sa dalan F. Ramos ning syudad. Ang kalihokan alang sa SM Baby Company alang sa umaabot nga pag-abli sa SM Seaside City sa South Road Properties sa hinapos nga semana karong bulan sa Nobiyembre ning tuiga.

Dugang pa, alang usab sa dugang kasayuran mamahimong motawag sa DMDP sa Telephone Numbers 253 – 9212 ug 254-4348. (Cebu City Public Information Office PIO/Greggy Jiggs P. Senados/Cebu City PIO)