CCMC Mobungat og P549 Million alang sa Tuig 2014

Gibutyag sa hepe sa Cebu City Medical Center (CCMC)nga mosugyot siya og P549 milyones nga budget alang sa ospital para sa tuig 2014 aron molambo pa ang pag-serbisyo sa CCMC ngadto sa mga kabus.

Matud ni Dr. Gloria Duterte nga P450 milyones ang budget nga ilang pangayoon alang sa Personnel Services (PS) ug Maintenance and Other Operating Expenses (MOOE) apil ang mga tambal.

Apan gawas sa P450 milyones si Duterte mosugyot pa og laing P99 milyones nga Capital Outlay aron gastohon sa pagpalit og mga medical equipment ug pagtukod og dugang hospital building.

Ang pagpamalit og mga tambal og medisina sama lang gihapon karong tuiga ang isugyot nga budget ni Duterte nga P80 milyones.

Nahinangop si Duterte kay anam-anam na unya nga molambo ang CCMC tungod sa pag-abag ni Senador Pia Cayetano ug sa mga nagpakabana nga katawhan.

Si Senador Cayetano mihatag og P1 million nga gahin alang sa CCMC aron gamiton sa pagpanindot sa pedia ug OB-Gyne wards nga gisugdan na nila sa pagsubasta.

Matud ni Duterte nga aduna usa ka Non-Government Organization (NGO) nga motabang sa CCMC pinaagi sa pagpatukod og hospital building alang sa Children’s Hospital.

Gibutyag ni Duterte nga mangayo pa gayud siya og tabang gikan sa Deppartment of Health (DOH) alang sa ubang hospital expansion project sa ingon daghan pa nga pasyente ang maalagaran sa CCMC.

Pagka karon 300-bed capacity pa ang CCMC apan plano ni Duterte nga mahimo unta kini nga makadawat og 600 ka pasyente.

Si Mayor Michael Rama miingon nga plano niya nga magmugna og satellite hospital adto sa Barangay Bonbon aron makaalagad kini sa mga lumulopyo sa kabukirang barangay.