CCMC Ipaguba Na

Gipahibalo ni Mayor Michael Rama nga iyang ipaguba ug ipabungkag ang Cebu City Medical Center (CCMC) kay miinsistir g’yud ang mga structural ug civil engineer nga kuyaw na gamiton pa ang ospital building nga natukod 52 ka tuig na ang milabay.

Si Vice President Jejomar Binay giubanan ni Mayor Rama pagsusi sulod sa CCMC ug ilang nabana-bana nga gabok na kaayo ang maong ospital ug peligro na estahan pa og mga pasyente.

Ang mayor mipahibalo nga ipabalhin niya ang kabomberohan nga nag-estar sa Fire Station atbang sa CCMC aron ang fire station building maoy temporaryo nga paestahan sa mga pasyente.

Si Rama nagkanayon nga nakumbinsir siya sa findings sa mga technical personnel nga misusi sa CCMC mao nga aron paglikay sa dugang problema, iya na lang ipaguba ang ospital.

Human gipahibalo ni Rama nga ipaguba niya ang CCMC, dunay mga tawo nga gianognan kay ang ospital building gipanindot na gani ni CCMC director Gloria Duterte.

Ang kabomberohan nga sakop sa Cebu City Fire Department adto ipahimutang ni Mayor Rama sa Parian Fire Station samtang ang mga sakop sa Regional Fire Marshall’s Office adto ibutang sa Cebu City Sports Center.

Gipasabot ni Mayor Rama nga peligroso kaayo kon moinsistir siya nga gamiton ang CCMC kon mahitabo nga mahugno kini panahon nga adunay laing linog.