Cash Assistance sa ‘Seniors’sa Buwan sa Hulyo, Wa pa’y Siguro

Walay kasigurohan nga ang mga senior citizens dinhi sa dakbayan sa Sugbo makadawat ba sa laing hugna sa ilang cash assistance gikan sa City Hall karong buwan sa Hulyo.

Gikatakda nga ang ikaduha nga hugna sa pagpanghatag og cash assistance pagahimoon sa Hulyo, unya ang ikatulo adto na sa Septiembre ug ang katapusang hugna sa Disyiembre.

Sanglit nahatag na man ang pasiuna nga tag P4,000 sa matag usa sa kapin dul-an sa 60,000 ka senior citizens, ang P6,000 na lang ang ihatag kanila nga bahin-bahinon og ta’g duha ka libo ka pesos sa matag hugna.

Daghang mga senior ang miduol sa mga reporters aron mangutana sa mayor kon makadawat ba sila sa laing hugna sa ilang cash assistance karong sunod buwan.

Matud ni Rama nga dili pa siya mopasalig niini kay magsugod ang bag-o niya nga termino pagka mayor karon pa’ng Hulyo 1.

Ang Cebu City Council adunay ordinansa nga giaprobahan nga ang cash assistance sa mga senior ihatag kanila matag buwan apan ang maong lagda wala tumana ni Rama.

Matud ni Rama nga ang executive department maoy magbuot kon kanus-a ipanghatag ang cash assistance ngadto sa mga senior citizens depende kon adunay budget alang sa maong katuyoan.