Cash Assistance Alang ‘Solo Parents’ Wala pa Aprobahi

Wala dayon aprobahi sa Cebu City Council ang tinguha ni Konsehal Gerardo Carillo nga pahatagan og tag P5,000 nga cash assistance kadtong gitawag og mga “Solo Parents” nga ania magpuyo sa dakbayan sa Sugbo.

Matud ni Carillo nga sa pagka karon adunay kapin lang sa usa ka libo ka Solo Parents ang nag-parehestro sa Department of Social Welfare and Development (DSWD).

Apan si konsehal Eugenio Gabuya Jr. nagtoo nga kon mapublikar na nga ang dakbayan sa Sugbo mohatag og cash assistance sa mga Solo Parents, mahimong maglumba ang mga mo-aplay didto sa DSWD.

Ang gilalisan nga wala kaayo makahatag og pagpasabot si Carillo mao kon unsa ang gitawag og Solo Parent, apil ba kadtong mga tawo nga adunay mga anak apan gituyo nga wala lang gayod magpakasal.

Sa ordinansahon ni Carillo nga diha na unta sa final deliberation naglatid nga ang Solo Parent mao kadtong mga babaye nga adunay anak apan gibiyaan sa ilang mga kapuyo o bana.

Matud sa mga konsehal nga husto ang panglantaw ni Gabuya nga mahimong modaghan pag-ayo ang mga solo parent kon madungog na nga manghatag na usab og hinabang ang dakbayan sa Sugbo.

“Tingali pagka karon gamay pa apan kon mapublikar na nga manghatag ang dakbayan og cash assistance tingali basin modaghan pa kini sa gidaghanon sa mga senior citizens,” matud ni Gabuya.

Si Carillo subli nga mopresentar sa iyang ordinansahon atul sa sesyon karong umaabot Miyerkoles.