Carreta, Tejero, Quiot Gideklara’ng ‘State of Calamity’

Ang konseho sa dakbayan sa Sugbo mideklarar na nga ang Barangay Carreta, Tejero ug Quiot Pardo ubos na sa State of Calamity tungod sa daghang kabalayan nga naugdaw sa mao nga mga dapit.

Si Konsehal Eugenio Gabuya Jr. mipasabot nga kinahanglan nga madeklarar ang mao nga mga barangay nga state of calamity aron nga makagamit ang dakbayan sa Sugbo sa iyang Calamity Budget pagtabang sa mga nasunogan.

Kapin sa 500 ka pamilya sa mao nga mga barangay ang nawagtangan sa ilang mga balay dihang miulbo ang sunog Martes sa hapon didto sa utlanan nga bahin sa Carreta ug Tejero ug pagka-kaadlawon didto sa Quiot.

Mga sakop sa Department of Social Welfare and Services (DSWS) nga gipangulohan ni Ester Concha miapud-apod gilayon og mga pagkaon sa mga nasunogan. Matud ni Concha nga ang paghatag nila’g pagkaon sa mga biktima sa sunog molungtad og tulo ka adlaw.

Mga biktima sa sunog panghatagan usab unya og mga construction materials sa dakbayan aron sila makapatukod pagbalik sa ilang mga balay.

Ang mga imbistigador sa kabomberohan wala pa makapagawas og resulta sa ilang imbistigasyon kon ngano nga miulbo ang sunog sa duha ka buwag nga lugar.

Gitan-aw usab karon sa City Hall ang posibleng pagbutang na gayud og access road diha sa Sitio Laray sakop sa Tejero nga kilid ra sa Doña Pepang Cemetery.

Nabantayan nga ang mga bombero naglisud pagpawong sa kaso tungod sa kakuwang og mga access road kay ang ilang mga fire trucks didto ra mahimutang sa layo.

(Image Credit: www.philstar.com)