Capitolyo Mihatag ug Ayuda Pinansyal sa Dinagat Festival sa Cordova

Mitagana ug P1.95M ang kagamhanan sa lalawigan sa Sugbo isip ayuda pinansyal sa 2022 Dinagat Festival sa lungsod sa Cordova.

Matod sa Provincial Government nga ang 13 ka barangay sa maong lungsod mu salmot sa nahisgutang kalihukan diin makadawat sila ug tig P150,000. Nasayran nga ang maong ayuda maoy gamiton sa mga gastoonon may labot sa maong kalihukan.

Gi congratulate hinuon ni Gobernador Gwen Garcia ang lungsod sa Cordova gumikan kay matod pa sa duha ka tuig nga nawala ang Dinagat Festival, mituman gihapon ang katawhan sa strikto nga pagbawal sa mga pundok ug uban pang mga kalihukan gumikan usab sa COVID-19 pandemic.

Nagkanayon si Garcia nga ang maong ayuda pinansyal makatabang sa 13 ka barangay aron mabalik gayud ang Dinagat Festival.

Ang Dinagat Festival maoy nagpakita sa kinabuhi sa mga mananagat sa Cordova, usa sab kini ka kultura sa mga lumulupyo ngadto.

Ang lungsod sa Cordova naila sa “Linarang nga Bakasi”, usa ka iladong sud-an nga gina balik balikan sa mga tawo.

Si Sr. San Roque sab ang patron sa maong lungsod.

Ang Dinagat Festival usa sa mga mu salmot sa Pasigarbo sa Sugbo – Festival of Festivals karong tuiga. Ipahigayon kini karong August 28 sa Cebu City Sports Center.

49 ka mga festival gikan sa nagkadaiyang mga lungsod sa Sugbo ang musalmot.