Bus Operators Nangayo’g Usbaw sa Pletehan

Ang kahugpongan sa mga bus operators dinhi sa Sugbo mipahibalo nga mopatuman sila og usbaw sa pletehan sa mga bus pasaheroan tungod gipatuman nga lagda sa Land Transportation Franchising and Regulatory Board (LTFRB) nga nagdili na sa pag-renew sa rehistro sa mga bus nga nagpangidaron na og 15 anyos pataas.

Sumala pa sa tigpamaba sa mga bus operator dinhi sa lalawigan sa Sugbo kinsa mao usab ang Presidente sa Cebu South Mini Bus Operators Association na si Jolito Flores nga nakadisisyon na ang mga tag-iya og bus pasaheroan sa Sugbo nga moduso og petition alang reinstatement sa 2008 fare matrix nga giaprobahan sa LTFRB Manila.

Iyang gipasabot nga ang rason sa ilang pagpangayo og usbaw dili tungod sa pagsaka sa presyo sa battery, spare parts ug spare tires, kun dili ang kadako sa gasto sa pagpalit og bag-ong mga bus.

Miingon si Flores nga dili man sila maka-abot sa pagpalit og bag-ong unit sa bus nga ikahulip sa ilang mga karaang sakyanan.

Gipasabot ni Flores nga wala nay laing nahuna-hunaan ang mga bus operator nga makahipos og kwarta gawas lamang sa pagpatuman sa usbaw sa pletehan nga dugay na nga naaprobahan niadto pang tuig 2008 apan wala lamang una nila gipatuman hangtud karon.

Sa mao unyang usbaw, P8.50 na ang plete sa unang lima ka kilometro, ug P1.45 na ang mosunod nga kilometro nga mas taas og P2.50 sa pletehan karon nga tag P6.00 matag unang lima ka kilometro ug P1.20 sa mosunod nga kilometro.

Samtang si LTFRB-7 Regional Director Ahmed Cuizon miingon nga wala pa siya makadawat sa naasoy nga petisyon gikan sa mga tag-iya og bus pasaheroan sa Sugbo.

Gipahibawo hinuon ni Cuizon nga iyang gipanid-an ang desisyon sa ilang labaw nga opisyal sa LTFRB kun iapil ba niini ang Sugbo sa ipatuman nga 50 sentabos nga provisional fare increase nga gipangyo sa transport sector didto sa kaulohan.

Kini samtang wala pay hingpit nga desisyon ang LTFRB Manila sa ilang gipangayo nga usbaw sa pletehan sa mga Public Utility Jeepney(PUJ).

Dinhi sa Sugbo, ang CITRASCO miduso og petisyon sa LTFRB-7 nga nangayo og P2.50 mga usbaw sa pletehan gikan sa P7.50 ngadto na sa P10.00 alang sa PUJ.

Wala pa hinuon madawat ni Cuizon ang kamandoan sa ilang labaw nga opisyal kun kanus-a ipatuman ang public hearing dinhi sa Sugbo kalabot sa maong isyu.