‘Buhing Kalbaryo 2014’ Nauyunan sa Mayor

Gihulagway ni Mayor Michael Rama nga mas maanindot ang pasundayag sa Buhing Kalbaryo karong tuiga kun itandi sa nangaging katuigan.

Ang “Buhing Kalbaryo” maoy linawas nga pasundayag sa pagpasakit ni Hesukristo kaniadto gikan sa panahon nga siya gidakop ug hangtud nga gilansang siya sa mga Hudiyo didto sa balabag sa bukid sa Golgota.

Kapin sa 100 ka volunteers – mga batan-ong babaye ug lalaki – ang mosalmot sa pasundayag.

Ang mga sumasalmot sa Buhing Kalbaryo mipakita sa kabahin sa ilang pasundayag didto sa usa ka hotel sa dalan Borromeo kagahapon Huwebes, ug ang mayor misaksi.

Nakatampo sa kaanindot sa linawas nga pasundayag mao ang pagsalmot sa pipila ka dramatorgo sa bantawan ug radyo nga bansay kaayo nga mo-acting sa stage nga dili na magbasa og script.

Ang dramatorgo nga si Sim Romarate maoy nagdala sa papel ni Ponso Pilato nga maoy gobernador sa Roma diha’ng gidakop si Hesukristo ug gidala sa iyang atubangan.

Ang kanhi konsehal sa San Nicolas Proper nga si Lyntoni Sable larino usab kaayo nga midala sa papel isip asawa ni Pilato.

Ang midala sa papel ni Hesukristo karaang sakop sa grupo, apan wala kini sulti-sulti sa pasundayag.

Magsugod sa Patio San Nicolas ang Buhing Kalbaryo ug sundon pagbunal si Hesukristo subay sa V. Rama Avenue hangtud nga moabot sila sa lagwerta sa simbahan sa Guadalupe nga adto siya ilansang sa krus atol sa Biyernes Santo.

Ang sama nga grupo mopasundayag usab og sugat sa pagkabanhaw sa Dominggo, Abril 20.

Image Credit: www.myshutterspace.com