Bugas Gikan sa Vietnam Taliabot na Dinhi sa Sugbo – NFA 7

● Mikabat sa 1.5 milyones ka sako sa bugas humay nga gikan sa Vietnam moabot sa Sugbo karong tapos buwan.

Gibutyag sa National Food Authority (NFA)-7 nga magsugod na og pangabot dinhi sa Sugbo ang gikompra nilang bugas humay gikan sa Vietnam nga mikabat sa 1.5 milyones ka sako sa katapusang semana sa bulan sa Mayo ning tuiga.

Ang tigpamaba sa NFA-7 nga si Ma. Lucia Rosales nagkanayon nga 1.5 milyones ka sakong bugas humay ang gigahin isip allocation sa Central Visayas ug sa Eastern Visayas.

Matud pa ni Rosales nga ang maong kargamento maoy labing unang biyahe sa bugas gikan sa Vietnan ug allocation sa region 7 ug 8 alang niining tuiga.

Si Rosales miingon hinuon nga mokabat lamang sa 120 mil ka sakong bugas ang unang shipment sa barko gikan sa naasoy nga nasud. Gipasabot niya nga sa maong gidaghanon nga shipment sa bugas, 700 mil ka sako lamang ang gitagana alang sa region 7 samtang 800 mil ka sako ang gigahin alang sa Samar, Leyte ug ubang probinsiya sa region 8.

Dugang pa ni Rosales nga mas dako ang allocation karong tuiga sa region 8 itandi sa region 7 tungod kay wala pa makabangon ang mga mag-uuma sa humay sa naasoy nga lugar human maapektohi sa bagyong Yolanda sa miaging tuig.