Budget sa Dakbayan sa Tuig 2015, Isumiter Na

Si Konsehal Margarita “Margot” Osmeña moduso na ngadto sa Cebu City Council karong Miyerkoles sa iyang committee report kun pila ang kantidad sa Annual Budget 2015 nga iyang irekomendar nga paaprobahan sa mga konsehal.

Samtang si Konsehal Osmeña wala motug-an kun pila ang iyang irekomendar nga kantidad nga paaprobahan sa City Council, apan daghan ang nangagpas nga halos katunga sa P19.1 Bilyones nga gisugyot ni Mayor Michael Rama ang dili malakip sa budget.

Atol sa budget hearing, si Konsehal Osmeña migaling og mga pangutana sa Local Finance Committee kun unsaon nila nga makolekta ang gihulagway nga dako kaayo nga kantidad.

Si Osmeña miangkon nga wala gayud siya makontento sa tubag sa mga sakop sa Local Finance Committee tungod kay sa P19.1 Bilyones nga gisugyot nga budget, ang P10.6 Bilyones adto kuhaon sa halin sa yuta nga ibaligya diha sa South Road Properties.

Gitataw sa konsehal nga sa lima ka parsela nga yuta nga igbabaligya sa SRP ug gihimong “sources of funds” sa budget, duha ra niini ang adunay pagtugot sa City Council nga mabaligya sa mayor.