BSP Magsaulog sa Ika-21 ka Tuig nga Anibersaryo Ugmang Adlawa

Ang Bangko Sentral ng Pilipinas (BSP) magsaulog sa iyang ika-21 nga selebrasyon ugmang adlawa, Agusto 15, ug usa sa iyang dakong kalihukan dinhi sa Sugbo mao ang pagpanghatag og award sa tanang may kalabutanan sa pagpalambo sa tanang programa sa BSP sa rehiyon 7.

Magsugod ang pagpanghatag sa award sa alas 10:00 sa buntag hangtud ala 1:00 sa hapon sa Banking Hall sa BSP Cebu Regional Office, sa dalan Osmeña Boulevard, Cebu City uban sa tema nga “Forging Stronger Alliances. Propelling Sustainable Growth.”

Ang pagpanghatag sa award pangunahan ni Monetary Board member Felipe M. Medalla diin lima alang sa outstanding partners, duha alang sa Business Expectation Survey (BES), usa alang sa tinubdan sa kasayuran bahin sa regional economic development, usa sa advocacy support para sa outstanding credit surety fund, ug usa alang sa currency programs sa BSP.

Ang hatagan sa award mga pinili gikan sa nag-unang mga korporasyon sa rehiyon 7. Ang kalihukan ugma maoy ikalima nga gihimo sa BSP gikan niadtong Hulyo ngadto sa Septembre, sa 11 ka lugar gawas sa National Capital Region (NCR).

Kini aron sa pagpasidungog sa tanang adunay kalambigit sa mga gimbuhaton sa BSP.

Ang mga kaabag sa BSP sa NCR unang nakadawat sa ilang mga award niadtong Hulyo 9 didto sa BSP main office.

Kining maong mga kalihukan gilaumang labing makapalig-on sa kadugtungan sa BSP ug sa iyang mga kaabag nga korporasyon alang sa kalampusan sa mga programa niini para sa ikaayo sa nasud.