BoQ Nagkinahangla’g Dugang mga Nurse

Nagkinahanglan og dugang mga nurse ang Bureau of Quarantine (BoQ) sa Central Visayas matud pa ni Dr. Terrence Bermejo, ang hepe sa BoQ-7, kaganinang buntag.

Miingon si Bermejo nga tuyo niya nga mamonitor sa higpit ang mga pasahero ug tripolante sa mga international flights nga motugpa sa Mactan Cebu International Airport (MCIA).

Apan dili lamang sa MCIA kundili bisan sa uban pang tugpahan sa Central Visayas nga matugpahan sa mga abyon gikan sa Africa.

Sa pagkakaron, nagpadayon ang BoQ sa pagpatuman sa heighten alert tungod sa paghugpa sa Ebola virus didto sa Africa.

Busa gihugtan usab sa BoQ ang pagpaniid sa tanang pasahero nga gikan sa gawas sa nasud ilabi na niadtong gikan sa Africa.

Pinaagi sa thermal scanner dali ilhon ang temperatura sa lawas sa pasahero ug tripolante sa eroplano ug mao kini ang pabantayan sa mga marekurida nga nurse sa BoQ, sumala ni Bermejo.

Midugang ang hepe sa BoQ nga ila usab nga hatagan og mga checklist ang tanang mga pasahero nga kompleto sa tanang gikahanglan nga kasayuran ilabina sa ilang address ug telepono aron sayon na lamang ang pagpangita kanila kun may simtoma sila sa Ebola virus.

Samtang sa laing bahin gipalerto usab sa Department of Environment and Natural Resources (DENR-7) ang tanang mga wildlife monitoring units sa tanang mga pantalan ug tugpahanan sa upat ka mga probinsiya sa Central Visayas, matud pa ni DENR7 Regional Executive Director Isabelo Montejo.

Kini aron walay makasulod sa Central Visayas nga mga hayop sama sa chimpanzees, gorillas, fruit bats, monkeys, forest antelope ug porcupines, gikan sa mga nasud nga gihugpaan sa Ebora virus sama sa nasud sa Guinea, Sierra Leone ug Liberia sa West Africa.

Image Credit: philstar.com