BOPK Nagpabiling Mayorya sa Konseho, Team Rama Pakyas sa Tinguha

Naminghoy ang mga konsehal nga sakop sa Team Rama kagahapon tungod kay napakyas sila sa ilang tinguha nga hukasan sa chairmanship sa mga gamhanang komitiba ang mga kauban nila nga konsehal nga alyado sa Bando Osmeña Pundok-Kauswagan (BOPK).

Nahibaw-an pa sa mga konsehal nga alyado sa Team Rama nga ang mga konsehal nga sakop sa BOPK mao diay gihapon ang nagpabilin nga mayoriya diha sa konseho sa dakbayan bisan og may mga konsehal na nga mibuwag sa ilang pundok ug miipon sa pundok ni Mayor Michael Rama.

Sukwahi sa gipaabot sa mga konsehal sa Team Rama, sila pa hinuon ang nahukasan sa mga komitiba, ilabi na kadtong mga konsehal nga sakop kaniadto sa BOPK ug mitapon na sa Team Rama. Nakamugna ug grabe’ng lantugi ug kaguliyang sa konseho kagahapon ang tinguha sa Team Rama.

Ang konseho sa dakbayan sa Sugbo gilangkoban na karon sa siyam ka sakop sa BOPK ug walo na alyado sa Team Rama. Naklaro na g’yud nga sila si Konsehal Richie Osmeña, Noel Wenceslao ug Gerardo Carillo tua makapusta sa Team Rama.

Si Mayor Rama mismo ang miangkon nga ang mao nga mga konsehal kanunay nga mitambong sa ilang tigum sa mga konsehal nga alyado sa Team Rama.

Wala masayop si Kanhi Kongresista Tomas Osmeña nga si Konsehal Roberto “Bob” Cabarrubias maoy nagsilbi nga ”dark horse” ug maoy nakapadaug sa BOPK kay didto kini misuporta kanila.

Ang Team Rama, pinaagi ni Konsehal Philip Zafra, maoy una nga miawhag nga ibakante ang tanang mga pwesto sa lainlaing komitiba ug miduso siya og mga ngalan sa mga konsehal nga mohupot sa mao nga mga puwesto.

Sa 22 ka komitiba sa konseho, bugtong si Konsehal Nestor Archival lang ang gihatagan unta nila ug chairmanship sa committee on parks and playground.

Apan misupak ang mga konsehal sa BOPK ug si konsehal Sisinio Andales nakiglantugi sa ilang mga kaatbang. Taliwala sa grabe’ng lalis si Konsehal Nendell Hanz Abella mihimo og Motion for Adjournment sa ilang sesyon.

Si Konsehal Wenceslao nga diha ra sa iyang tupad abtik kaayo nga misegunda sa awhag, ug si Vice Mayor Labella abtik usab kaayo nga nakadukdok sa martilyo.

Miulbo ang grabe’ng lantugi nila ni Andales ug Labella. Ang bise mayor mibiya sa lamesa kay gipatigbabaw niya ang hukom nga tapuson na gayud ang ilang sesyon. Apan aala makaagwanta si Labella taliwala sa grabe’ng kaguliyang sa konseho mao nga mibalik siya ug gideklarar nga ipadayon ang sesyon.

Kini maoy hinungdan nga gibotohan sa mga konsehal ang pagbasura sa han-ay sa chairmanship sa mga komitiba nga giduso ni Konsehal Zafra.

Si Konsehal Eugenio Gabuya mihimo og privilege speech, dayon miduso ug bag-ong mga ngalan sa konsehal nga mohupot pagka chairman sa lainlaing komitiba.

Bisan ug ang lista gipreparar sa BOPK, apan adunay tulo ka konsehal sa Team Rama nga gihatagan og chairmanship sa lainlaing komitiba. Sila mao si Maryann delos Santos isip chairman (Health ug Hospital Committee); James Cuenco (Tourism) ug Hanz Abella (Trade and Commerce).

Si Konsehal Margot Osmeña gipabilin nga chairman sa committee on budget and finance samtang si Konsehal Andales sa committee on laws, ang gihulagway nga duha sa gamhanang komitiba sa konseho.

Wala nay mga konsehal sa Team Rama nga misupak sa bag-ong lista kay nasuta nila nga walo ra diay ka konsehal ang alyado sa Team Rama samtang siyam ang BOPK.

Si Mayor Michael Rama mibaliwala ra nga napilde ang Team Rama sa eleksyon kay matud niya nadugangan man og tulo ka konsehal ang iyang grupo.

Dungan sa kadaugan sa eleksyon sa mga alyado sa BOPK diha sa konseho, si kanhi kongresista Tomas Osmeña miingon nga ang nahitabo nagsilbing usa ka leksyon sa iyang kaatbang nga si Mayor Rama.

Si Konsehal Margot Osmeña miingon nga nalipay kaayo siya sa resulta sa eleksyon nila sa konseho kagahapon nga nahitabo human sa kaguliyang.

Samtang si Cabarrubias mitataw nga gipili niya ang BOPK tungod kay nasuta niya nga dili corrupt nga glider niini nga si Osmeña. Gihandom niya nga kaniadto diha nga nagtrabaho pa siya sa General Electric Company ang dakbayan mipalit og P30 milyones nga kantidad sa Sodium lamps ug si Tommy wala gayud mangayo og komisyon.