Boluntaryong Pagpawong sa mga Suga Alang sa Earth Hour Marso 19, Giaghat

Tagbilaran City (PIA)— Giaghat na usab ang mga Bol-anon nga makighiusa sa kalikopan ug sa mga nagtamud sa usa ka oras o kapin pa, aron tamdun ang tinuig nga Earth Hour sa sunod Sabado, Marso 19.

Ang Earth Hour usa ka kalihukan nga gitamud sa daghang mga nasud sa tibuok kalibutan. Kini naga-aghat sa matag-usa, mga katilingban, kabalayan ug mga estabisemento sa pagpawong sa mga wala gikinahanglang suga sulod sa usa ka takna: alas 8:30-9:30 sa gabii.

Ang maong pag-pakighiusa maoy kaugalingong tampo isip pagduyog sa paningkamot nga kunhoran ang konsumo sa koryente nga kasagaran namugna dala na usab sa pamaagi nga makadaut sa kalibutan.

Una nga gisugdan sa World Wildlife Fund, ang Earth Hour gihimo na sa matag tuig, sa matag buwan sa Marso, diin labing duol sa summer equinox diin ang kalibutan makasinati sa labing dulom nga kagabhi-on.

Gisugdan sa Australia niadtong 2007, ang Earth Hour mikatap na nagdto sa kapin sa 7 mil ka dagkong syudad ug kalungsuran sa daghanang nasud sa tibuok kalibutan.

Dinhi sa Bohol, maghimo na usab sa ika unom ka tuig nga walay bugto nga paghimog kalihukan subay sa Earth Hour.

Usa ka Night Bike Ride ang himoon sa mga mahilig sa bisekleta nianang gabhiona, ug ang mga mosalmot, mopasiga hinoon sa ilang mga blinkers samtang magsikad sa mga bisekleta libut sa syudad sa Tagbilaran.

Sa miaging tuig, kapin sa usa ka gatus ka bikers ang misalmot: may mga babaye ug kabataan nga mi-apil og luwan sa ilang mga bisekleta aron moduyog sa kalihukan.

Samtang nagpedal ang mga mosalmot, ila usab nga isaad nga pagngon ang mga suga sa ilang mga panimalay, samtang menosan ang paggamit sa koryente nianang taknaa.

Tungod usab niini, nag-aghat ang mga tigpasiugda sa kalihukan sa Bohol ngadto sa mga tag-iyahag mga dagkong establisemento sa Bohol sa pagpakunhod o pag “dim” sa ilang mga suga agig pagduyog.

Matud sa mga tigpasiugda sa kalihukan sa Bohol, ang Earth Hour maoy haum nga higayon nga masaulog sa usa ka tawo ang iyang panaad sa kalibutan, ug unta maaghat pa ang mga kabanay sa pagsalmot, sa ilang mga nagkadaiyang pamaagi.

Ang pagpawong sa mga suga sa kabalayan sulod sa usa ka oras, maoy labing yano nga paghimog pagduyog sa Earth Hour.

Mahimo usab nga maghimog candle-lit dinner, makig-bayloayg sugilanon sa mga silingan, magnanaw sa paunawpunawan, mag camping og makiglambigit sa mga kalihukan nga namugna alang niini. (rac/PIA-7/Bohol)