BOI Mipalapad sa Pangalagad

Ang Department of Trade and Industry (DTI) ug ang Board of Investments (BOI) mipalapad sa ilang pangalagad sa mga lalawigan aron makatukod og luag nga kalikopan sa pamatigayong lokal ug internasyonal sa tibuok nasud, matud pa ni DTI Undersecretary Ponciano C. Manalo Jr. kagahapong adlawa.

Matud pa ni Manalo nga ang central office sa BOI hugot nga nanguna sa mapadayunong pagpalig-on sa iyang mga buhatan ilabi na sa Kabisay-an ug Mindanao.

Midugang si Manalo nga may tulo na ka extension nga mga opisina ang BOI karon nga nahimutang sa mga siyudad sa Cebu, Davao, ug Cagayan de Oro nga moalagad sa mga rehiyon sa habagatan.

Ang sangang buhatan niini sa Cebu moalagad sa tibuok rehiyon sa Visayas samtang ang mga extension office sa Cagayan de Oro ug Davao moalagad sa Northern Mindanao ug Southern Mindanao.

Matud pa ni Manalo nga nakapahigayon na sila og mga panagtagbo sa nahisgutang mga extension office sa BOI aron masayran nila ang mga gipaluyong hinabang sa pamatigayon gikan sa Investment Assistance Services Center (IACS) sa ulohang buhatan sa BOI didto sa Makati City.

Sa samang higayon, gibutyag ni Manalo nga dili pa dugay nakigtagbo usab ang BOI sa mga local government units (LGU), national government agencies (NGAs), and investment promotion agencies (IPAs) sa mga lalawigan nga nahimutangan sa ilang mga sangang buhatan, ilabi na sa Cebu, Davao, Misamis Oriental, and Zamboanga.

Ang mga miting nga gipangunahan ni BOI Investment Assistance Center Executive Director Raul V. Angeles,nagpasadig sa mga opisyal sa LGU uban sa ilang mga kawani nga patukoron og usa ka dakong buhatan nga motabang sa mga investor, sa pag-ila sa mga malaumang lugar alang sa tukoron nilang negosyo sa ilang tagsa-tagsa ka dapit.

Midugang si Manalo nga ang mga ahensya nga nagsangyaw og mga pamuhonan sama sa Mindanao Development Authority, Philippine Veterans Investment Development Corporation (Phividec) Industrial Authority, ug Zamboanga City Special Economic Zone Authority (Zambo Ecozone) gipadasig usab nga motabang pagtudlo og mga lugar sa ilang dapit alang sa mga pamatigayon sa mga investor nga lokal ug langyaw.