Bodega sa Mandaue Nasunog

Nasugod na unta sa pagsilaob ang kayo sa kisame sa bodega sa Matimco Lumber Inc. nga nahimutang sa Barangay Ibabao, Dakbayan sa Mandaue alas 11:04 ang takna kagahapon sa buntag apan dali kining napawong sa nagtinabangay nga trabahante ug mga bombero.

Si SF01 Nilo Cosedo sa Mandaue City Fire Station miingon nga ang mga trabahante nga nagporma na daan og ilang kaugalingong fire brigade maoy nakapakgang sa pagdako sa sunog sa maong bodega nga gipundohan sa mga imported nga mga lumber.

Dugang pa niya nga igo lang nakasinati og gamay nga kadaut ang atop sa maong bodega tungod sa pagsilaob sa kayo nga namugna gikan sa napanit nga kuryente.

Si Cosedo miingon nga dihang ilang gisusi ang atop diin nagsugod sa pagsilaob ang kayo sa natumba nga poste nga gikutayan sa linya sa kuryente ug didto kini motugpa sa atop sa maong bodega.

Gumikan sa pagkatumba sa poste, ang linya sa kuryente nasaghid sa atop nga GI sheet ug milanay kini sa kainit sa panahon nga maoy hinungdan sa pagmugna og kayo nga nagsugod na sa pagsilaob.

Sa nasayran nga sukad sa Enero karong tuiga nasinati sa dakbayan ang tulo ka mga sunog nga nahitabo nga maoy hinungdan nga daghan ang mga lumolupyo ang nawad-an og pinuny-anan.

Naglakip sa mga nasunog mao ang Barangay Banilad, Barangay Tingob ug Barangay Alang-Alang nga nasunog niadtong Domingo.