BOC-7 Nagduda: Cebu Gigamit sa ‘Smuggling Activities’

Mitumaw karon ang pagduda nga gigamit sa smuggling activities ang Cebu pinaagi sa gipanghatud nga mga ayuda alang sa reconstruction ug rehabilitation sa mga lugar sa Eastern Visayas nga gikusokuso sa bagyong Yolanda sa miaging tuig.

Kini human pugngi sa Bureau of Customs(BOC) sa Cebu ang kargamento sa Royal Cargoes Inc. didto sa Mactan Cebu International Airport(MCIA) nga gi-consign sa Energy Development Corp.

Ang maong mga kargamento gideklarar nga mga relief goods alang sa mga biktima sa bagyong Yolanda sa Leyte niadtong unang semana sa bulan sa Marso ning tuiga. Apan nasuta nga ang maong kargamento mga ekipo bahin sa enerhiya ug dili relief goods.

Gawas niini, namatud-an usab nga ang maong kargamento importable, apan walay tax exemption gikan sa Department of Finance (DOF).

Laing kargamento nga gi-hold usab sa BOC mao ang usa ka container nga donasyon nga gisudlan sa upat ka mga minibus CCE Motors nga gi-consign sa giingong “Guardians” nga dili usa ka non-government organization.

Ang tinubdan nagkanayon nga personal nga gisusi ni Cebu District Collector Reynaldo Almadin ang naasoy nga kargamento.

Gipasabot hinuon ni Atty. Kenneth Kern Sesante, sinaligan ni Almadin, nga may 30 ka adlaw pa ang consignee niini sa pagkompleto sa mga panginahanglanong papeles.

Hinuon, iyang gitataw nga sa higayon nga mapakyas kini sa pagsumeter sa nahisgutang mga dokumento sa naasoy nga kargamento human sa lugway nga 30 ka adlaw, ideklarar kini sa BOC nga abandoned cargoes nga nagpasabot nga ang gobyerno na ang manag-iya niini ug mahimo na kining ika- auction sa BOC.