Bitin Momasahe sa Lawas sa Tawo?

Tinuod ba gyud nga makamasahe sa kalawasan sa usa ka tawo ang pagpakamang sa dagkong bitin nga anaa gialimahan diha sa Cebu City Zoo?

Kini maoy una nga nabaniog nga balita nga ingon sa gimasahean ang lawas sa tawo kun pakamangan kini sa dagko kaayo nga bitin nga gibuhi ni Zoo Caretaker Giovanni Romarate.

Ang mao nga mga bitin nga ang gidak-on susama na sa paa sa tawo ang dapit sa tiyan ug dako pa sa bitiis ang ulo, dili mamaak gawas lang tingali kun pasakitan.

Daghang tawo nga mosuroy diha sa Cebu City Zoo sa Barangay Kalunasan, babaye ug lalaki, magpakuha og hulagway nga maghigda sa gituyo pagtukod nga lantay’ng kawayan og magpakamang sa dagko’ng bitin.

Si Romarate miingon nga dili g’yud tinuod nga makamasahe ang bitin sa lawas sa tawo sukwahi sa gipanabi sa uban aron lang daghan ang magpakamang sa bitin nga ilang binuhi.

Matud ni Romarate nga gituyo nila paghimo ang lantay aron adunay magpakamang sa bitin sa tumong nga mahibaw-an nila nga dili danglog ang panit sa bitin.

Ang tulo ka dagko kaayo’ng bitin diha sa Cebu City Zoo dili mamaak. Si Romarate miingon nga naanad na og tawo ang bitin kay gamay pa kini nga ilang gialimahan.

Ang bitin molantaw pa sa mga tawo nga mopalayo na kanila human magpakuha og hulagway. Tambag ni Romarate sa katawhan nga dili patyon ang mga bitin nga ilang makit-an.

Gitudloan ni Romarate ang katawhan nga kun makakita’g bitin itsahan ug tabunan lang og panapton ang ulo aron dili na kini molihok.

Ang bitin nga matabonan na ang ulo magtuo nga sila nakatago na. Dinhi nga bahina nga tawgon dayon ang mga tinugyanan sa Zoo aron mnaoy modakop sa bitin.

Image Credit: newsinfo.inquirer.net