Bisekleta Makasulod na sa SRP

Sigurado nga maglukso-lukso sa kalipay ang mga sayklesta kon mga “bikers” dinhi sa dakbayan human nga ang Cebu City Council miuyon sa ilang hangyo nga pasudlon sila diha sa baybayon nga bahin sa South Coastal Road (SRP).

Si Konsehal Gerardo Carillo maoy mitabang sa mga sayklesta pinaagi sa pagsugyot og resolusyon sa konseho nga tugotan ang mga sakop sa Sugbo Bikers nga makabisekleta diha sa lapad nga karsada daplin sa dagat sa SRP.

Hinoon, bisan paman og giaprobahan sa konseho nga makasulod ang mga bikers, duna’y oras nga sila maka-bike sa maong dapit sa SRP og kini himoon lang gikan alas-4 hangtud sa alas-8 sa buntag ug matag alas-5 hangtud alas-8 sa gabii matag Lunes ngadto sa Sabado.

Tibuok adlaw sa Dominggo makagamit sa mao nga lugar ang mga hilig mag-bike ug kadto’ng mag-jogging.

Ang Sugbo Bikers nga gilangkuban og kapin usa ka gatos ka sakop gipangulohan ni Robert Pangilinan.

Matud pa ni Carillo nga ang seawall roadside sa SRP usa ka nindot nga lugar para sa maglingaw-lingaw ug mag-exercise ang katawhan tungod sa presko nga hangin ug kanindot sa palibot.

Si Vice Mayor Edgardo Labella miawhag sa SRP Management nga magbutang og pahimangno sa entrada sa SRP aron mahibalo ang katawhan sa mga lagda.

Gisugyot usab ni Konsehal Mary Ann delos Santos nga tugotan na lang usab kadtong hilig maligo sa dagat nga anha maligo sa dagat sa SRP.

Image Credit: fstoppers.com