BIR Bukas Himoong 25 Porsento ang Individual Tax

Bukas ang Bureau of Internal Revenue (BIR) sa balaodnon nga i-ubos sa 25% ang individual income tax gikan sa kasamtangang 32%.

Matud pa ni BIR Commissioner Kim Henares, nga wala niya igsapayan ang maong sugyot ni Senador Sonny Angara, apan iyang gitataw nga kinahanglan pa kini og makuting pagtuon.

Dugang pa sa kalihim nga karong tuiga maayong unahon pagpalabang ang ubang balaodnon sama sa fiscal incentive rationalization ug mining revenue sharing bills.

Giingong isunod niini sa umaabot nga tuig, si Henares mismo ang mohatag og proposal kun unsaon pag-rationalize ang bracketing sa income tax aron mo-ubos kini.

Matud pa nga kinahanglang tarungon usab ang tibuok sistema sa pagbuhis aron maduso ang 25% income tax.

Samtang nagtukod na karon og technical working committee si Senador Angara aron plantsahon ang maong balaodnon nga target ipatuman sa tuig 2017.

Una nang mihatag og pahayag ang Malacañang pinaagi ni Presidential spokesperson Edwin Lacierda nga ila nang gitugyan sa Department of Finance (DOF) ug BIR ang desisyon kalabot sa balaodnon nga i-ubos sa 25% ang individual income tax.

Image Credit: www.philstar.com