Binalhinay sa City Hall sa Bag-ong Tuig

Dakung lahugay sa mga department head sa Cebu City Hall ang ipatuman ni Mayor Mike Rama sa unang bahin sa buwan sa Enero 2014.

Gibutyag kini mismo sa Mayor apan wala pa siya mohatag og detalyi kon kinsa gayud ang mga department head nga mabalhin sa laing katungdanan.

Apan usa ka kasaligang tinubdan diha sa City Hall mitug-an nga apil nga maapektahan sa pagahimoong revamp mao si City Administrator Jose Marie Poblete nga gihugon-hugonan nga itudlo nga bag-ong city engineer nga mangulo sa Department of Engineering and Public Works (DEPW).

Gihulagway nga si Poblete haum usab sa mao nga katungdanan kay gawas nga siya abogado usa usab siya ka civil engineer. Nagdumili pa hinoon si Poblete paghatag og pamahayag kabahin niini kay matud niya wala pa siya makagunit og dukomento.

Sigon sa report nga si City Engineer Kenneth Carmelita Enriquez temporaryo nga hulipan pagka city engineer aron maka-concentrate siya sa pagdumala sa Office of the Building Official (OBO) nga laing departamento sa City Hall nga siya usab ang nagdumala.

Hinoon si Enriquez gitudlo nga permanent city engineer apan ang mayor gihatagan og katungod nga makabalhin sa mga permanent employees sa lain nga katungdanan sa termino nga dili molapas ang tuig kon ang iyang serbisyo gikinahanglan sa laing pwesto.

Dunay laing tinubdan nga mibutyag nga si Dr. Alice Utlang nga kanhi city veterinarian og karon temporaryo nga gidistino sa Department of Agriculture (DA) idistino nga maoy modumala sa City Office for Substance-Abuse Prevention (COSAP).

Si Cathy Yso nga kanhi hepe sa Department of Social Welfare and Services (DSWS) og karon tua gidistino sa prisohan sa mga menor-de-edad gikataho nga balhinon pagdistino sa Parian Drop-In Center nga ang trabaho mao gihapon ang pag-atiman sa mga bata nga libud-suroy.

Gawas kang Poblete ug Utlang, duna pay daghan nga department head nga malakip sa paglahugay nga ipahibalo unya sa mayor karong sunod semana.