BFP: Cebu City Kulang og Fire Hydrant

Gitug-an ni Bureau of Fire Protection (BFP-7) Regional Director Maria Luisa Hadjula nga usa sa nag-unang kakulangan sa dali unta nga pagpawong sa sunog sa 9 ka mga sitio sa barangay Lorega, San Miguel niadtong Martes sa gabii mao ang mga fire hydrant.

Miingon si Hadjula nga kun may igo pa untang mga fire hydrant nga nakita ug nagamit sa kabomberohan niadtong higayona, hayan dili unta mudako pa ang kayo.

Gani nagkadayon si Hadjula nga ang iyang buhatan mihangyo sa kagamhanan sa syudad sa Sugbo nga butangan og mga fire hydrant ang nag-unang lugar sa syudad, aron dili na maproblema ang kabomberohan sa supply sa tubig sa higayon nga motumaw ang sunog susama sa nahitabo sa barangay Lorega, San Miguel.

Sa iyang bahin, si Cebu City Councilor Dave Tumulak miingon nga ang kagamhanan sa syudad sa Sugbo mohimo og lakang kalabot niini. Iya hinuong gitataw nga may fire hydrant na dinhi sa Sugbo apan dili kaayo daghan ang gibutang sa Metro Cebu Water District (MCWD).

Sa sunog sa Lorega, San Miguel, si Tumulak nagkanayon nga angayan nga tun-an ang maong sugyot sa mga kadagkuan sa BFP.

Laing ihangyo ni Hadjula sa kagamhanan sa syudad mao ang re-blocking sa mga barangay kansang kabalayan nagsikit-sikit, aron daling makasulod ang ilang mga fire trucks ug sayon na lamang ang pagpapawong sa sunog.

Samtang si Mayor Mike Rama nagtinguha karon nga dalion ang pagpahigayon sa re-blocking sa mga nasunogang barangay diin sikit kaayo ang kabalayan.