“Behold…Bohol” Tourism Branding Gilusad sa Kaulohan

Ang lalawigan sa Bohol nilusad kagahapon sa bag-ong tourism branding niini didto sa Grand Ballroom sa Marco Polo Hotel sa Ortigas, syudad sa Mandaluyong. Ang paglusad sa “Behold…Bohol,” usa usab ka pag-anunsiyo ngadto sa tibuok kalibotan sa opisyal nga branding sa lalawigan sa Bohol isip tourist destination sa nasod.

Ang maong paglusad gi-ubanan usab sa pagpahibalo sa mga kalamboan sa Bohol sama sa pagbukas sa bag-ong international airport sa lungsod sa Panglao sunod tuig ug ang padayong suporta gikan sa United States Agency for International Development (USAID).

Ang USAID, sa pakigbulig sa Department of Tourism (DOT) ug World Tourism Organization (WTO), nitabang sa lalawigan sa pag-ugmad sa Bohol Tourism Recovery Program (BTRP), diin namugna ang branding nga “Behold…Bohol.”

Sa maong paglusad, gi-renew usab sa lalawigan sa Bohol ang kasabotan tali sa airline partner niini nga AirAsia, nga dugangan ang ilang flights nga Manila ug Bohol gikan sa tulo ka flight ngadto na sa upat ka flights matag adlaw. (ecb/PIA7-Bohol)