Batakang Serbisyo Dalhon sa Tugkaran sa mga Sugbuanon- Mayor Rama

(Cebu City PIO) – Kabahin sa misyon sa pang-gobiyerno ni Cebu City Mayor Michael L Rama mao ang pagdala sa batakang serbisyo ngadto sa tugkaran sa mga Sugbuanon. Dili man kini literal nga tugkaran sa ilang panimalay apan ngadto gayod sa ilang tagsa-tagsa ka mga barangay.

Agig pag tuman niini, pinaagi sa inisyatiba sa Mayor ang kagamhanan ning dakbayan nagpahigayon ug senemana nga “Community Outreach Program” nga mas nailhang “City Hall at Your Doorsteps” kon “Piyesta sa Pagpangalagad,” diin matag adlawng Biyernes dalhon ang mga serbisyo sa 22 ka mga departamento sa Cebu City Hall ngadto sa mga kabarangayan.

Biyernes karong semanaha Pebrero 13, 2015, ang mga residente sa Barangay Taptap maoy duawon sa mga kawani sa dakbayan aron sa paghatod ug libreng mga serbisyo nga ipahigayon ngadto mismo sa Sports Complex sa maong barangay.

Kahinumduman nga kanunay nga gibalik-balik sa Mayor nga, “Ato kining buhaton lukop ning dakbayan, kamong katawhan angay gayod hatagan sa tim-os nga pangalagad sa ngalan sa tiunay nga serbisyo.”

Samtang ang maong programa naghatod ug mga libreng batakang panerbisyo sa katawhan sama sa konsultasyon sa rehistro sa pagkatawo, pagpakasal, ug pagkamatay; medikal ug dental nga serbisyo; pagpanglimpyo sa mga kanal ug drainage; pagpanaod ug pagpang-ayo sa mga street lights; pangpang-rehistro, kapon ug bakuna sa mga iro ug iring; paghatag ug laboratory services sama sa blood-typing ug blood sugar testing; feeding ug pangtuli sa mga kabataan; pagpanghatag ug mga seedlings; ug seminar sa epekto sa pagamit ug ginadiling druga, traffic rules, mga kalambuan sa dakbayan, ug uban pa.

Dugang pa, Biyernes sa milabayng semana Pebrero 6, ang mga residente sa Barangay Kasambagan maoy nahatagan sa libreng mga serbisyo gikan sa Cebu City Hall nga gidala ngadto sa ilang tugkaran. (Cebu City Public Information Office)