Bata ang Mitug-an sa Pagkadakop ni ‘Pachoy’

● Kapolisan mitumbok nga si Pachoy ang notadong kriminal nga responsable sa daghang pagpamatay dinhi sa dakbayan.

Ang lider sa giingong grupo sa mga kriminal dinhi sa dakbayan sa Sugbo gibudhian sa iyang batan-ong sakop hinungdan nga siya nadakpan sa kapolisan.

Sakop sa Grupo

Ang kapolisan miingon nga usa ka menor de-edad nga sakop sa grupo maoy nakatug-an kanila kun asa makit-an si Manuel Richard Corominas alyas Pachoy.

Si Corominas maoy gitumbok sa kapolisan nga notado’ng kriminal nga responsable sa daghan nga pagpamatay dinhi sa dakbayan.

Miangkon

Tuod human madakpi si Pachoy, iyang giangkon nga ang iyang grupo maoy naghimo niadtong sunod-sunod nga carnapping sa miagi’ng semana ug siya ang mipusil sa duha sa mga biktima, apil na sa higala ni Mayor Michael Rama.

Si Corominas nga nailado sa angga nga Pachoy nadakpan sa kapolisan kaniadto’ng Domingo sa kaadlawon didto sa Barangay Day-as human ang menor de-edad nga kauban niini sa grupo mitug-an sa mga polis kun asa makit-an ang ilang lider nga miangkon usab nga mipusil-patay sa paryente ni Vice Mayor Edgardo Labella.

Si Superintendent Romeo Santander, hepe sa Cebu City Police Intelligence Branch (CIB), mitug-an nga ang menor de-edad nga sakop sa grupo ni Pachoy una nila nga napik-ap didto sa Barangay Calamba kaniadto’ng hapon sa Mayo 31.

Una nga miangkon ang batan-on nga sila maoy responsable niadto’ng sunod-sunod nga carnapping diin duha sa mga tag-iya sa sakyanan, apil ang higala ni Rama nga si Eleanor Rivera, ila’ng gipusil kaniadto’ng gabii sa Mayo 25.

Adunay Target

Gisaysay sa menor de-edad nga kaniadto’ng Mayo 25 sa hapon, ang ilang grupo aduna unta’y target nga tulison mao nga miadto sila sa Talisay apan sanglit wala nila makita ang negosyante busa nangita na lang sila og laing mabiktima aron dili mausik ang ilang lakaw.

Nangilog og Taxi

Ang drayber sa taxi nga ilang gisakyan pag-adto sa Talisay giilogan nila sa sakyanan ug misirit sila pagbalik dinhi sa dakbayan sa Sugbo. Wala masayri unsa’y tumong sa grupo nga mitungas man sila sa Barangay Tabunan, bukid nga bahin sa dakbayan sa Sugbo.

Gibanggaan nila ang nagmaneho’g motorsiklo ug sa pagkatumba, gipusil nila ang usa sa mga pasahero niini.

Samtang adunay laing nagsakay og motor nga mihunong sa maong dapit ug nagpakisusi sa diahng gihapak ni Pachoy sa armas sa iyang ulo.

Ang taxi gibiyaan sa grupo ug gisakyan nila ang duha ka motor apan pag-abot nila sa Ayala Heights, nakita sa grupo ang Sports Utility Vehicle (SUV) ni Rivera nga nag-parking. Gipusil ni Pachoy si Rivera ug gipugos pagpakanaog apil ang kauban.

Natsambahan sa Rivera

Matud ni Santander nga duna g’yuy target ang grupo ni Pachoy sa mao nga higayon ug natsambahan lang si Rivera. Gitumbok ni Pachoy ang lain niya nga kauban nga giila niya sa angga nga Tambok nga maoy misugyot nga ilogan nila sa SUV ang babaye.

Pagpatay sa Pag-umangkon ni VM Labella

Mag-atubang og daghang kaso si Pachoy. Siya ang gitumbok nga mipatay ni Rolan Colina nga paryente sa bise mayor ug gitumbok usab si Pachoy nga maoy nagpatay ni Victoriano Balungkit ug sa kauban nga si Jerome Pasolohan didto sa Talisay kaniadtong Mayo 8.

Laing Kaso

Gitudlo usab si Pachoy nga maoy mipatay ni Teodorico Tolentino didto sa Salvador Extension, Labangon kaniadtong Mayo 29.

Nalipay kaayo si Vice Mayor Labella nga nadakpan na g’yud si Pachoy.

Nakadawat og kasayuran ang kapolisan nga si Pachoy nagplano na g’yud nga molayas paingon sa Mindanao tungod kay gipangita na siya pag-ayo dinhi sa Sugbo.