Basurahan sa PUJ, Sunod Target sa CESET

Ang mga drayber sa Public Utility Jeepney (PUJ) maoy sunod nga target sa mga kawani sa Cebu City Hall aron pangdakpon kun masakpan nga wala sila magbutang og basurahan sulod sa ilang sakyanan.

Gibutyag ni Grace Luardo, ang hepe sa City Environmental Sanitation Enforcement Team (CESET), nga adunay ordinansa nga naglatid nga ang mga PUJ kinahanglang magbutang gayud og basurahan sulod sa ilang mga sakyanan.

Pagbuwag-buwag sa Basura

Duha ka basurahan ang ilang ibutang, ang usa alang sa mga basura nga malata ug ang usa sa dili malata. Pananglit ang pasahero mag-inom og plastic bottled water, inighuman niya’g inom ang plastic adto niya isulod sa sudlanan alang sa dili malata.

Wala na Gituman

Nabantayan ni Luardo nga daghang mga PUJ driver ang wala na motuman niini nga lagda sa ordinansa sa dakbayan mao nga sugdan nila ang paghimo’g kampanya nga walay pasayloay sugod sunod semana.

DPS Drivers

Samtang gibutyag ni Luardo nga ang tanang 200 kapin ka garbage trucks sa Department of Public Services (DPS) ug sa kabarangayan nadakpan na nila ang tanang drayber sa paglabay og basura didto sa landfill sa Consolacion ug Inayawan nga wala ma-segregate.

Hinoon, gihatagan lang usa nila og kahigayonan ang mga basurero nga mag-usab pinaagi sa wala paghimo og ikaduha nga pagpanakop sulod niining semanaha.

Matud ni Luardo nga sugod Lunes, ang pagpanakop himoon kada biyahe sa garbage truck kun ang gihakot nila nga mga basura wala mabuwag-buwag ang mga malata ug dili malata.

C.O. 1361

Kadtong madakpan nga dili makig-amicable settlement pinaagi sa pagbayad og P500, pasakaan og kaso sa hukmanan nga paglapas sa City Ordinance 1361.

Gidayeg ni Luardo ang mga barangay nga nagsigi g’yud og segregate sa ilang mga basura nga mao ang Banilad, Pit-os, Bacayan, San Jose ug Quiot.