Basura sa Dakbayan sa Sugbo, Dili pa Malabay sa Talisay

Samtang uyon si Talisay City Mayor Johny V. De Los Reyes nga palabayon og mga basura ang dakbayan sa Sugbo sa ilang landfill sa Barangay Tapul, apan supak ang mga konsehal sa dakbayan sa Talisay.

Matud ni Talisay City Vice Mayor Romeo Villarante nga daghan sa mga konsehal sa Talisay nga supak sa tinguha ni Mayor JVR kay sigurado nga daghan ang moreklamo ug makamugna lang kini og dako’ng problema.

Base sa balaod, ang mayor makahimo lang pagpirma og kasabutan tali sa lainlaing grupo o kaha laing Local Government Unit (LGU) kun adunay pagtugot sa konseho.

Si Villarante miingon nga kun tugotan nila nga ang mga garbage trucks sa dakbayan adto na mohatud og mga basura sa landfill sa Barangay Tapul, makasinati g’yud og grabe’ng problema kay gamay kaayo ang karsada paingon sa maong dapit.

Gipasabot ni Villarante nga daghan ‘sab g’yud nga lumolupyo sa lainlaing subdivision nga maagian sa maghakot og basura ang sigurado nga mangreklamo.

Apan si Mayor JVR mipasabot nga dako kaayo ang bentaha kun tugotan sa Talisay nga ang dakbayan sa Sugbo makalabay og basura sa ilang landfill sa Barangay Tapul.

Gibana-bana ni JVR nga mokita ang dakbayan sa Talisay og mga P3 milyones kay ang dakbayan sa Sugbo mobayad man og ‘tag P700 sa matag tonelada (1,000 kilos) nga basura nga malabay sa Barangay Tapul.

Matud ni JVR nga ang Talisay mogasto og mga P400 mil matag buwan sa pagmentinar sa ilang landfill. Kini nagpasabot nga kun dawaton nila ang tanyag sa kagamhanan sa dakbayan sa Sugbo, makaginansya pa sila og kapin sa P2 milyones.

Ang dakbayan sa Sugbo tua karon milabay og mga basura sa pribado’ng landfill sa Barangay Polog, Consolacion ug nagbayad gihapon og P700 sa matag tonelada nga basura.

Kada adlaw adunay kapin sa 300 toneladas nga basura nga mahakot ngadto sa landfill gikan dinhi sa dakbayan sa Sugbo.

Ang kanhi Inayawan Sanitary Landfill diha sa Barangay Inayawan wala na gayud palabayi og mga basura ni Mayor Michael Rama kay misugwak na ang mga sagbot og nakalapas na kini sa balaod.