Barangay Officials sa Syudad Nakadawat na sa Dugang Honorarium

Ang mga opisyal sa mga barangay dinhi sa dakbayan sa Sugbo unang gipanghatagan Huwebes kagahapon sa ilang dugang honorarium gikan sa City Hall alang sa buwan sa Oktobre ug Nobyiembre.

Tag singko mil pesos ang mata’g buwan nga dugang honorarium sa mga kapitan, tag tres mil pesos ang sa mga konsehal ug tag dos mil pesos sa mga barangay secretary ug treasurer.

Matud ni City Treasurer Diwa Cuevas nga una nila nga nahatagan sa ilang dugang honorarium ang mga opisyal sa kabarangayan sanglit wala sila magdugay pag-andam sa mga payroll sanglit gamay ra ang mga opisyal sa barangay.

Dinhi sa dakbayan sa Sugbo duna lay 80 ka kapitan ug 720 ka konsehal, apil ang mga barangay treasurer ug secretary.

Dunay nagduda nga gihatagan g’yud og unang pagtagad sa mayor ang mga opisyal sa barangay apan wala kaayo hatagi og dakung pagtagad ang mga Persons with Disabilities.

Si City Administrator Jose Marie Poblete miingon nga paninguhaon nila nga ang mga PWD makadawat na sa ilang tag P2,000 nga kuwang sa tag P5,000 nila nga cash incentive sa dili pa moabot ang pasko.