Bangko Sentral: Dunot nga Salapi, Dawaton

Mga tag-iya og tindahan ug ang mga negosyante giawhag sa tagdumala sa Bangko Sentral ng Pilipinas (BSP) ug Cebu Bankers Club nga dawaton ra nila ang mga dunot na nga kuwarta gikan sa katawhan kay ilisan ra kini sa bangko.

Si Maria Luz Berciles, pangulo sa BSP-Central Visayas, miluwat sa awhag kay nakadawat siya’g reklamo nga adunay mga tag-iya’g tindahan nga dili modawat og mga dunot na nga kwarta kay kuno dili na usab dawaton sa bangko.

Matud ni Berciles nga ang mga bangko obligado g’yud nga modawat sa daan og dunot nga kwarta subay sa gipatuman nila nga clean notes policy.

Giedukar ni Berciles ang publiko sa kalainan sa gitawag nga “unfit” ug “mutilated” nga kwarta. Ang “unfit” mao ang kwarta nga daan ug gum-os apan mailisan ra kini dayon sa Bangko, apan ang “mutilated” nga kwarta mao ang mga nasunog, nagisi ug gipapitlan og tape nga dili dayon diha-diha nga mailisan.

Samtang si Joey Umerez sa Cebu Banker’s Club mipasalig usab sa publiko nga ang mga bangko modawat g’yud og mga daan nga mga kwarta.

Giawhag sa mga tagdumala sa bangko ang mga negosyante nga dili mahadlok sa pagdawat sa mga dunot na nga kwarta kay ilisan gihapon kini nila.

Alang niadtong mga tawo nga balibaran sa mga tindahan, mahimo silang moreklamo sa BSP ug isulti lang ang pangalan tindahan nga mibalibad kanila.