Bakuna Batok Dengue Gitun-an sa Dakbayan sa Sugbo

Posible nga bakuna batok sa makamatay nga sakit nga dengue ang gitun-an karon sa Cebu City Health Department (CHD).

Matod ni Dr. Ilya Tac-an, ang pangu sa Epidemiology, Surveillance, Research and Infection Control Division nga daghang bakuna ang gi istudyohan karon sa ilang ahensya sa dakbayan sa Sugbo batok Dengue.

Kahinumduman nga niadtong Hunyo ning tuiga, nakatala ug kapin 1,363 ka kaso sa dengue ug 17 niini namatay ang dakbayan sa sugbo sulod lamang sa unang unom (6) ka bulan sa tuig 2022.

Gibutyag ni Tac-an nga mamahimo sab nga mu isyu ug emergency use ang goberno sa anti-dengue vaccine sama sa COVID-19 vaccine, hinuon gi angkon sab ni Tac-an nga angay kining hatagan ug maayong pag tuon ug oras ug dili kini angay dali dalion kay aduna may proseso ug sistema nga gisunod.

Kahinumduman sab niadtong tuig 2016, mipagawas ang nasudnong kagamhanan ug labing unang bakuna batok dengue apan gihunong kini niadtong 2017 gumikan posible kining makamugna ug impeksyon alang ngadtong mga tawo nga wala pa ma expose sa maong virus.

Subay sa maong isyu kahinumduman nga naka mugna sab kini ug national scandal ug lain laing mga alegasyon gumikan dunay mga bata nga namatay human sa pagbakuna.

Niadtong Hulyo 22 ning tuiga, nakatala na ang Cebu City ug 1,812 ka kaso sa dengue karong tuiga.

Sigon sab ni Tac-an nga kanunay nagpahigayon ug community monitoring ingon man surveillance ang ilang buhatan.

Samtang gi awhag sab ni Tac-an ang publiko sa paghimo ug mga lakang aron malikayan ang dengue, sama sa kanunay nga paglimpyo sa tugkaran, ug paglikay sa mga lugar nga posibleng pondohan sa mga lamok.

Ang CHD nanawagan sa tanan nga gub-on ang mga breeding grounds sa mga lamok sama sa mga flower vase, air conditioning units, mga ligid ug water containers.