Bag-ong Resibo Tinugutan sa BIR Magsugod karon Hulyo 1

Daghan gayud ang mga magpapatigayon nga mapahamtangan og multa kun dili sila makagamit og bag-o nga mga resibo nga aprobado sa Bureau of Internal Revenue (BIR) alang sa ilang mga customer ug mga kliyente sugod sa Hulyo 1.

Kadaghanan sa mga magpapatigayon, apil gani ang pipila ka sibyahanan sa radyo nga maoy tigsabwag og balita, wala masayud niining maong bag-ong balaud nga buot ipatuman sa BIR.

Sigun sa rekord sa BIR nga gamay ra kaayo ang mga magpapatigayon nga nangayo’g pagtugot nga makaparehestro sila og mga bag-ong resibo, mao nga nagtuo sila nga ang ubang magpapatigayon wala lang magtagad.

Ang Revenue Regulations No. 18-2012 giluwatan sa BIR kaniadto pa nga miaging tuig ug naghatag og taud-taud nga panahon sa mga negosyante nga makapa-imprinta og bag-o nga resibo.

Matud ni BIR Commissioner Kim Jacinto Henares nga ang kamandoan sa BIR gipublikar nila sa mantalaan.

Hinoon nabantayan nga daghan ang wala makabasa niini kay samtang ilado ang maong pamantalaan apan dili kaayo daghan ang mopalit niini aron mobasa og balita.

Ubos sa regulasyon nga ang negosyante kinahanglang mo-apply sa pagpa-imprinta og mga resibo mga duha ka buwan sa dili pa ipatuman ang kamandoan karong Hulyo 1.

Kadtong mga negosyante nga mo-apply sa pagpa-imprinta og resibo lapas kaniadtong Abril 30 multahan na og P1,000 samtang kadtong moaplay lapas sa Hunyo 30 ug dili gayud makagamit sa bag-ong resibo ang maximum nga multa nagtangag na og kantidad nga P50,000.

Ang usa sa tumong niini mao nga mahibaw-an kadtong mga kompaniya nga mopagamit ug mobaligya ra sa ilang resibo sa mga bogus nga kompaniya  nga nagnegosyo sa kagamhanan.

Gidid-an na usab sa BIR nga makapang-imprinta og resibo kadtong mga printing shops nga iya sa mga kawani ug opisyal sa BIR nga motuyo sa pagdugay-dugay sa pag-approve sa application aron adto kanila magpa-imprinta ang mga negosyante.