Bag-Ong Paglaum Sa Kinabuhi Nasinati Sa PWD Sulod Sa AVRC

Ang Area Vocational Rehabilitation Center (AVRC) ll sa Cebu City nahimong taytayan sa bag-ong paglaum alang kang Jemelyn Beldad, nga may kapansanan sa panglawas nga polio.

Si Jemelyn, 32 anyos gikan sa bukirang bahin sa Barangay Cambanto, Argao, Cebu mi asoy sa iyang kaagi nga matud pa niya nahatagan ug bag-ong kinabuhi sa iyang pag sulod sa AVRC.

Nabiktima sa polio si Jemelyn sa edad ng 3 anyos human makasinati ug taas nga hilanat sulod sa usa ka semana.

Matud ni Jemelyn tungod sa kalayo sa ilang balay nga nahimutang sa bukirang bahin sa Barangay Cambanto (mu agi ug basakan ug sapa) kung mo adto sa Poblacion sa Argao, ug sa tumang ka kabus wala siya madala sa tambalanan nga maoy hinungdan sa iyang pagka polio.

Pinaaagi sa Department of Social Welfare and Development (DSWD) sa Argao nga mipahigayon ug census, natabangan si Jemelyn ug nadala sa AVRC niadtong tuig 2009.

Matud ni Jemelyn sa iyang 6 ka tuig sa AVRC nahatagan ug bag-ong paglaum ang iyang pananaw sa kinabuhi sukwahi sa iyang kahimtang didto sa bukid nga nagtago lamang sa sulod sa balay ug maulaw makit-an ug makig lambigit sa mga katawhang tungod sa iyang kapansanan.

Nakasinati usab siya sa mga pag biay-biay sa mga katawhan nga matud pa nila dili na siya mapuslan ug makatabang sa iyand mga ginikanan.

Nahatagan ug kahigayonan nga makat-on pagbasa ug sulat si Jemelyn kay sugkad sa iyang pagkatawo wala siya maka eskwela bisag grade one apan pinaagi sa dakong pagsalig sa Ginoo ug positibong pananaw sa kinabuhinakab-ot niya sa wala damha ang kalamposan sa iyang pagpakigbisog sa mga pagsulay sa kinabuhi.

Mi gradwar usab sa siya sa usa ka tuig nga training sa cosmetology ug kasamtangan nagdawat na ug regular nga income sa pag manicure, pedicure, facial, rebonding ug haircut.

Gawas sa maong regular income, gadawat usab siya ug financial assistance sa city government sa Cebu nga P12,000 matag bulan pareho sa gidawat sa mga senior citizen.

Tungod sa iyang paningkamot, matud niya nakatigom na siya ug igong kwarta alang sa iyang matag adlaw nga panginhanglanon ug nakatabang pa siya sa iyang mga ginikanan.

Dugang ni Jemelyn, nahimo niyang inspsirasyon ang ubang PWD nga nahimamat niya sa AVRC kay matud pa niya wala siya nag inusara nga may kapansanan sa panglawas sukwahi sa iyang pagtoo sa gapuyo pa siya sa bukid sa Cambanton nga walay nakitang pareho niyang may kapansanan.

Sa kasamtangang, malipayon nga mipaambit si Jemelyn nga kuntento na siya sa iyang kinabuhi pinaagi sa tabang sa AVRC diin nakat-onan niya nga mubarog sa kaugalingon ug halos dili siya makatoo sa kalamposan nga iyang nakab-ot.

Tungod niini nga kalamposan, ga plano siya nga motukod ug kaugalingon nga parlor aron padayon niya nga magamit ang iyang nakat-onan sa AVRC ug kung buligan sa Ginoo ang maong plano, mokuha usab siya ug mga kaubang PWD sa AVRC nga motrabaho sa parlor.

Mapahiyomon ug puno sa paglaum si Jemelyn nga miaghat sa ubang PWDs ug sa mga ginikanan niini nga pahimuslan ang tabang sa gobyerno nga gitagana alang sa mga katawhang may kapansanan ug dili angayan nga ika ulaw kini kay mentras normal pa ang ubang parte sa ilang panglawas, dili kini babag pagkab-ot sa ilang mga pangandoy nga mu asenso sa ilang panginabuhi. (lpp/PIA7/Negros Oriental)