Bag-ong Hepe sa Comelec 7 Molingkod Sugod Lunes

Bag-o na karon ang regional director sa Commission on Elections (COMELEC)-7 human ibalhin si Atty. Timmy Lambino ngadto sa region 8 niadtong adlawng Biyernes.

Base sa kamanduan gikan sa COMELEC central office, si Lambino makigbaylo ra sa director sa COMELEC region 8 nga si Atty. Rafael Olano.

Ang COMELEC resolution nagtug-an nga si Lambino maoy mi-apply nga madistino siya sa naasoy nga rehiyon tungod kay didto man siya magagikan.

Subay sa maong kalambuan, si Olano gitakdang molingkod sa iyang katungdanan dinhi isip regional director sa COMELEC -7 karong Lunes.

Ang mga opisyal sa COMELEC sa Central Visayas mipadayag usab sa ilang paghangop sa kalit nga kausaban sa ilang opisyal ug mipasalig nga magpadayon ang ilang pagtuman sa kamanduan ubos sa bag-ong regional director.