Bag-ong ABC President Nanumpa Na

Nanumpa na gayud atubangan ni Mayor Michael Rama si Philipp Zafra isip bag-ong presidente sa Association of Barangay Councils (ABC), ang kahugpongan sa mga barangay kapitan sa dakbayan sa Sugbo.

Uban ni Zafra nga nanumpa sa ilang katungdanan atubangan sa mayor mao si Tinago Barangay Captain Joel Garganera nga nagsilbi nga vice president sa ABC. Ang mga sakop sa ABC Board of Directors nanumpa usab sa ilang katungdanan.

Si Mayor Rama miawhag sa mao mga opisyal nga ayohon ang pagdumala sa ABC og hatagan og patas nga serbisyo ang tanang mga barangay, apil kadtong mga barangay nga ang kapitan alyado sa pikas nga grupo – ang Bando Osmeña Pundok-Kauswagan (BOPK).

Matud ni Zafra nga tumanon g’yud niya ang tukmang pagpanerbisyo sa katawhan nga dili magtan-aw og bulok-pamolitika tungod kay sila moserbisyo ngadto sa tanang katawhan.

Gipasabot ni Zafra nga sila mga representante lang sa kinabag-ang katawhan nga mipili sa mga opisyal sa tagsa-tagsa nila ka barangay.

Si Zafra miingon nga kini maoy rason nga patas usab ang iyang panerbisyo sa katawhan ilabi na diha sa konseho nga morepresentar sa mga opisyal sa barangay.

Ang Team Rama aduna na’y lima ka tingog diha sa konseho nga modugang nila ni Konsehal Nendel Hanz Abella, James Cuenco, Dave Tumulak ug Mary Ann delos Santos.

Hinoon, kon mahitabo ang “voting” kon magkasungi ang baruganan sa mga konsehal kabahin sa isyu, lupig gihapon sila sa mga konsehal nga alyado sa BOPK nga adunay 12 ka sakop.