Ayuhon ang Nalusno nga Minahan sa Danao?

Gipahibawo sa Department of Energy (DOE-7) nga ang SKI-Energy Resources Inc. (SERI) Mining Corporation mihangyo nga ilang ayohon ang nahugno nga minahan didto sa barangay Dunga, syudad sa Danao.

Si DOE-7 Regional Director Antonio Labios nagkanayon nga nadawat sa ilang buhatan ang hangyo sa SERI Mining Corp. niadtong miaging Biyernes.

Kini ang hinungdan nga ang iyang mga sakop miadto pagbalik sa naasoy nga barangay sa syudad sa Danao aron pagsusi sa kadako sa kadaut sa maong minahan.

Gitug-an ni Labios nga tun-an pa sa iyang buhatan ang hangyo sa maong kompaniya.

Gipasabot sa tagdumala sa minahan nga padak-an ang opening kun baba sa maong minahan ug palig-onon ang mga gigamit niining mga dapat aron dili na mahugno.

Apan iyang gipahibawo nga rasonabli ang gipangayo sa naasoy nga kompanya, apan kinahanglan nga motuman kini sa mga panginahanglan.

Usa sa gisusi pag-ayo karon sa DOE mao ang estriktong pagtuman sa gisetar nga safety standard alang sa mga minero niini.

Wala pa hinuon makahatag og kasayuran si Labios sa resulta sa ilang imbestigasyon sa hinungdan sa pagkahugno sa naasoy nga minahan nga mipatay og usa ka minero ug miangol sa laing tulo ka trabahante.

Kini tungod kay padayon pang gisuta sa iyang mga tawo ang mga pamahayag sa mga naluwas nga mga minero ug sa management sa naasoy nga minahan.

Image Credit: www.philstar.com